विराटनगर, ५ वैशाख । आगामी ३० वैशाखमा हुने स्थानीयतहको निर्वाचनका लागि मोरङको रतुवामाईमा नगरपालिकाको मेयरमा एमालेबाट अनेरास्ववियु उपमहासचिव भाष्कर खनालसहित ६ जनाको नाम सिफारिस भएको छ ।
एमालेको नगरस्तरीय संयन्त्रले पार्टीबाट मेयरको उम्मेदवारका लागि खनालसहित, दुर्गा विष्ट, गोपी चापाचाई, मेघराज कट्टेल, डीबी कार्की र प्रकाश ढकालको नाम सिफारिस गरेको हो ।
खनाल एमालेको विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) का केन्द्रीय उपमहासचिव, एमाले मोरङको जिल्ला कमिटी सचिवालय सदस्य र जनसंगठन समन्वय संयन्त्रको उपप्रमुख हुन् ।
त्यस्तै विष्ट एमाले मोरङको सचिवालय सदस्य तथा क्षेत्र नं. २ (क) का इन्चार्ज हुन् । चापागाई जिल्ला कमिटी सचिवालय सदस्य र मोरङ क्षेत्र नं. २ का इन्चार्ज हुन् । उनी २०७४ सालको निर्वाचनमा एमालेबाटै रतुवामाई–८ को वडाध्यक्षमा निर्वाचित भएका थिए ।
कट्टेल पार्टी जिल्ला कमिटी सचिवालय सदस्य तथा निर्वाचन विभाग प्रमुख हुन् । त्यस्तै कार्की पार्टीको प्रदेश कमिटी सदस्य र प्रकाश ढकाल रतुवामाईका स्थानीय नेता हुन् ।
सर्वसम्मत हुन नसकेपछि मेयरका आकांक्षी सवैको नाम सिफारिस गरेर पठाइएको एमाले रतुवामाई नगर कमिटीका कार्यबाहक अध्यक्ष कृष्ण ढकालले जानकारी दिए । उनका अनुसार उपमेयरका लागि चार जनाको नाम सिफारिस भएको छ ।
बर्तमान उपमेयर दमयन्तादेवी चुडाल, चन्द्रकला भण्डारी, सीता भुजेल र देवी गौतम सुवेदीको नाम सिफारिस भएको छ ।
