२ भदौ , काठमाडौं ।
काठमाडौंबाट थप ६० टिपर फोहोर आज विसर्जनस्थल बन्चरेडाँडा पुगेको छ । तर फोहोर फाल्न भने आज पनि स्थानीयले अवरोध गरेका छन् । बुधबार पक्राउ परेका स्थानीयलाई छोड्न माग गर्दै उनीहरूले फोहोर बोकेका गाडी बाटोमै रोकेका छन् ।
काठमाडौं महानगरपालिकाका प्रवक्ता नवीन मानन्धरका अनुसार पक्राउ परेकालाई रिहाई गर्न माग गर्दै स्थानीयले बिहानैदेखि अवरोध गरेका हुन् । ‘पक्राउ परेका एकजना स्थानीयलाई छाडेर मात्र फोहोर फाल्न दिन्छौं भनेर उहाँहरुले भन्नुभएको हो,’ प्रवक्ता मानन्धरले भनेका छन्, ‘हिजो भएको ४ बुँदे सहमतिमा सो विषय समावेश नभएको भन्ने उहाँहरुको गुनासो छ ।’ बुधबार नुवाकोट, धादिङ र काठमाडौंका प्रमुख जिल्ला अधिकारीहरु, ककनी गाउँपालिका र धुनवेशी नगरपालिकाका जनप्रतिनिधिहरु र प्रहरी अधिकारीसहित बसेर ४ बुँदे सहमति गरेका थिए ।
सो सहमतिमा पक्राउ परेकालाई रिहाइ गर्ने विषय उल्लेख नभएपछि स्थानीयहरूले अवरोध गरेको मानन्धरले बताए । काठमाडौं उपत्यकाको फोहोर उठ्न नसक्दा सहर दुर्गन्धित भएको छ । सरकारले गरेको सहमति कार्यान्वयन नभएको भन्दै स्थानीयहरु आक्रोशित हुँदै आएका छन् । सिसडोल र बन्चरेडाँडामा फोहोर फाल्न प्रहरी परिचालन गरिएकोप्रति स्थानीय बासिन्दालाई चित्त बुझेको छैन । प्रहरीको आडमा जबर्जस्ती फोहोर फाल्दा अन्याय भएको उनीहरूले बताएका छन ।
दुई–चार दिन जबर्जस्ती फोहोर फालेर दीर्घकालीन रूपमा समस्या समाधान नहुने उनीहरूको भनाइ छ । सरकारले फोहोर व्यवस्थापनका लागि एसपीको नेतृत्वमा प्रहरी परिचालन गरेको छ । काठमाडौंका मेयर बालेन्द्र साहले फोहोर व्यवस्थापनामा राजनीतिक अवरोध भईरहेको भन्दै असन्तुष्टि जनाउदै आएका छन् ।
