४ भदौ, काठमाण्डौ ।
भारतको अतिब्यस्त मायानगरी मुंबईलाई ध्वस्त पार्ने धम्की आएको छ । यस्तो धम्की मुंबई पुलिसको व्हाट्सएपमा आएको भारतीय मिडियाहरुले उल्लेख गरेका छन् । धम्कीपूर्ण यो म्यासेजमा भनिएको छ, कि मुंबईलाई उडाउने पुरै तयारी भएको छ । कुनै पनि समय हमला हुन सक्छ ।
यो हमला २६÷११ हमला जस्तै हुने पनि धम्की दिनेहरुले चेतावनी दिएको मुंबई प्रहरीलाई उद्रित गर्दै भारतीय संचारमाध्यमले लेखेका छन् । सो म्यासेज आएसंगै मुंबई पुलिस अलर्ट मोडमा रहेको बताइएको छ । धम्कीपूर्ण म्यासेज पठाउनेको पनि खोजी भइरहेको प्रहरी अधिकारीहरुले बताएका छन् ।
प्रारम्भिक अनुशन्धान अनुसार उक्त म्यासेज पाकिस्तानको नम्बरबाट आएको बताइएको छ । तर म्यासेजमा यो पनि भनिएको छ कि हाम्रो जाँच गरिए लोकेशन पाकिस्तान देखाउँने छ तर धमाका मुंबईमा हुने छ । उनीहरुले लेखेका छन्, भारतमा यो हमलालाई ६ जनाले अन्जाम दिनेछन् ।
ति सबै अहिले मुंबईमै रहेका छन् । मुंबई उडाउने धम्की मुंबई पुलिसकै व्हाट्सएपमा आएपछि यसले प्रहरी, प्रशासन, सर्वसाधारण, सरकार सबैको होस उडाएको छ । विशेषगरि यो म्यासेजलाई यति धेरै गम्भिरताले लिनुका पछाडि केही दिन पहिले महाराष्ट्रको रायगढ जिल्लास्थित समुन्द्रमा दुई संदिग्ध डुंगामा तीन एके ४७ राइफल भेटिएको थियो ।
यद्यपी त्यतिबेला प्रहरीले यसमा कुनै पनि आतंकी एंगल नभएको बताएको थियो । तर अहिले मुंबई उडाउने धम्कीपूर्ण म्यासेज आएपछि भने त्यसको कनेक्सन गम्भिर रपमा खोजिन थालिएको छ । यसअघि २६ नोभेम्बर २००८ को रात मुम्बईमा ठूलो आतंककारी आक्रमण भएको थियो । त्यसबेला लगातार ६० घण्टासम्म गोलाबारी चलेको थियो ।
मुम्बईको इतिहासकै सबैभन्दा ठूलो हमलामा १ सय ६० जनाभन्दा धेरैको ज्यान गएको थियो। हमलाकारीमध्ये ९ जनाको मुठभेडकै क्रममा मृत्यु भएको थियो । पक्राउ परेका एकमात्रै हमलाकारी पाकिस्तानी नागरिक आमिर अजमल कसाबलाई २०१२ मा मृत्युदण्ड दिइएको थियो ।
मृत्युदण्डको सजाय हुनअघि अजमलले पाकिस्तानमा केन्द्रीय कार्यालय रहेको अतिवादी इस्लामिक संगठन लस्कर–ई–तोइबाले यस आक्रमण गराएको खुलासा गरेका थिए । उनका अनुसार घटनामा मारिएका ९ हमलाकारी यही संगठनका सदस्य थिए ।
