३ असोज , काठमाण्डौ ।
नेपालको संविधान २०७२ जारी भएयता हरेक वर्ष असोज ३ लाई कालो दिनको रुपमा मनाउदै आएको जनता समाजवादी पार्टी नेपालले पहिलो पटक संविधान दिवसको शुभकामना दिएको छ । सो पार्टीका अध्यक्ष उपेन्द्र यादवले संविधान दिवसको शुभकामना दिएका हुन्। अध्यक्ष यादवले संविधान दिवसका अवसरमा सामाजिक सञ्जालमार्फत् शुभकामना दिएका हुन्। संविधान दिवसको शुभकामना दिँदै उनले हरेक नागरिकले संविधानको सम्मान गर्नुपर्ने र देशप्रतिको कर्तव्यमा पछि पर्न नहुने बताएका छन्।
दोस्रो संविधानसभाबाट २०७२ असाज ३ गते संविधान जारी हुँदै गर्दा यादवसहितका मधेशी शक्क्तिहरु आन्दोलनमा थिए। ६ महिना लामो चलेको उक्त मधेश आन्दोलन बिनानिष्कर्ष सकिए पनि मधेशी नेताहरुले अहिलेसम्म संविधानप्रति आफनो असन्तुष्टि व्यक्त गर्दै आएका छन्। उनीहरु संविधान संशोधनमार्फत् भए पनि आफूहरुले उठाउँदै आएका मुद्दाहरु सम्बोधन हुनुपर्ने माग राख्दै आएका छन्।
सुरुका केही वर्ष त असोज ३ गतेलाई यादव र अन्य मधेश केन्द्रित दलले कालो दिवसका रुपमा मनाउँदै आएका थिए। महन्थ ठाकुर नेतृत्वको लोकतान्त्रिक समाजवादी पार्टीले यो वर्ष पनि संविधान दिवसलाई विरोध गर्ने निर्णय गरेको छ। तर, जसपा अध्यक्ष यादवले भने संविधान दिवसको शुभकामना दिएका छन्। यो संविधानको विरोधमा रहे पनि मधेशी पार्टीहरु यो संविधान अन्तर्गत भएको दुईवटा स्थानयी तहको निर्वाचनमा भाग लिइसकेका छन्।
यस्तै दोस्रो आम निर्वाचनमा भाग लिने तरखरमा छन्। संघदेखि प्रदेशसम्मको सरकारमा समेत यादव र ठाकुरको पार्टी सहभागी भइसकेको छ। यसैबीच संविधानविद् डा. भीमार्जुन आचार्यले संविधानको प्रतिफल सत्ता र सत्ता संरक्षित गुटबाहेकले अनुभूति गर्न नपाएको बताएका छन्।
सोमबार सातौं संविधान दिवसको अवसरमा शुभकामना दिँदै संविधानविद् आचार्यले आम नागरिकहरुले संविधानको अनुभूति गर्न नपाएको बताएका हुन्। आचार्यले ट्विटमार्फत् भनेका छन्, ‘संविधानमा लेखिने चिजहरू सजावटका लागि नभै कार्यान्वयनका लागि हुन्छन्। संविधानमा लेखिएको एउटा शब्दको पनि ठूलो महत्व हुन्छ। दिन चाहे संविधानमा धेरै थोक छन्। यो अवधिमा सत्ता र सत्ता संरक्षित गुटबाहेक धेरैले संविधानको प्रतिफल पाएनन्। अब यस्तो नहोस्।’
