९ फागुन, काठमाण्डौ ।
आइसिसी क्रिकेट विश्वकप लिग–२ अन्तर्गत स्टकटल्याण्डविरुद्ध नेपाल २ विकेटले विजयी भएको छ । योसँगै नेपालले इतिहास रचेको छ । नेपालले पहिलोपटक लिग–२ सिरिजको चारवटै खेल जित्दै इतिहास रचेको हो । नामिबियालाई २ विकेटले यो श्रृंखलाको सुरुवात गरेको थियो । दोस्रो खेलमा स्कटल्याण्डलाई तीन विकेटले हराउँदै नेपालले लय कायमै राख्यो ।
तेस्रो खेलमा नेपालले नामिबियालाई ३ विकेटले हराएको थियो । सिरिजको चौथो खेलमा स्कटल्याण्डले दिएको २ सय १३ रनको लक्ष्य नेपालले ४४.१ ओभरमा ८ विकेट गुमाएर भेट्टायो । नेपालको जितमा कप्तान रोहितकुमार पौडेलले उत्कृष्ट पारी खेले । १०१ बलको सामना गरेका उनले अविजित ९५ रन बनाए ।
एकदिवसीयमा रोहितको यो सातौं अर्धशतक हो । यो जितसँगै नेपालले लिग–२ को शीर्ष तीनमा रहँदै सिधै एकदिवसीय विश्वकप छनोट खेल्ने सम्भावना जीवितै राखेको छ । स्कटल्याण्डविरुद्धको जितपछि नेपालले २८ खेलबाट २६ अंक जोडेको छ ।
अहिलेसम्म नेपालले लिग–२ मा १२ मा जित, १४ मा हार तथा दुई खेलमा अंक बाँडेको छ । अहिले नेपाल तालिकाको छैटौँ स्थानमा छ । नेपालसँग पराजित भएपनि स्कटल्याण्ड तालिकाको शीर्ष स्थानमा कायमै छ । लिग–२ मा स्कटल्यान्ड च्याम्पियन बनेको थियो।
लिग–२ को शीर्ष टिम स्कटल्यान्डले ३६ खेलबाट ५० अंक जोडेको छ। दोस्रो स्थानको ओमानले आफ्ना सबै ३६ खेल खेल्दा ४४ अंक जोडेको छ। तेस्रो स्थानको नामिबियाले अन्तिम ३४ खेलबाट ३७ अंक जोडेको छ। चौथो स्थानको अमेरिकाले सबै ३६ खेलबाट ३५ अंक जोडेको छ।
नेपालभन्दा माथि रहेको पाँचौ स्थानको युएईको २६ खेलबाट २७ अंक छ। पुछारको पिएनजीको २८ खेलबाट ५ अंक मात्र छ। लिग–२ का शीर्ष तीन टिम विश्वकप छनोटमा पुग्नेछन्। बाँकी चार टिमले क्वालिफायर प्लेअफ खेल्नु पर्नेछ। लिग–२ बाट स्कटल्यान्ड र ओमान विश्वकप छनोटमा पुगिसकेका छन्।
अब बाँकी एक स्थानका लागि नामिबिया, नेपाल र युएईबीच प्रतिस्पर्धा छ। आइसिसीले क्रिकेट विश्वकप २०२३ को छनोटका लागि तीन वटा लिग गरिरहेको छ। जसमा टेस्ट मान्यता प्राप्त १२ टिम र नेदरल्यान्ड्स गरी १३ टिमबीच सुपर लिग, नेपालसहित सात एकदिवसीय मान्यता प्राप्त टिमबीच लिग–२ र एसोसिएट टिमबीच प्रतिस्पर्धा भएको च्यालेन्ज लिग रहेका छन्।
सुपर लिगबाट ७ टिम र आयोजक भारत गरी आठ टिम विश्वकप २०२३ मा पुग्नेछन्। अब दुई स्थानका लागि सुपर लिगका पाँच टिम, लिग–२ का तीन टिम र क्वालिफायर प्लेअफका दुई टिम गरी १० टिमबीच छनोट प्रतियोगिता हुँदैछ। क्वालिफायर प्लेअफमा लिग–२ का चार टिम र च्यालेन्ज लिगका दुई टिम गरी छ टिमबीच प्रतिस्पर्धा हुनेछ।
