१ वैशाख , एजेन्सी । ।
रियल म्याड्रिडका पूर्व प्रशिक्षक जिनेदिन जिदानलाई भित्र्याउन साउदी अरेबियन क्लब अल नासरले प्रयास थालेको छ। विभिन्न खेल मिडियाहरुमा आएका खबरहरुलाई मान्ने हो भने जिदानलाई भित्र्याउन अल नासरले प्रयास थालेको छ । पोर्चुगिज स्टार क्रिस्टियानो रोनाल्डोको आग्रहमा अल नासरले जिदान भित्र्याउने प्रयास थालेको बताइन्छ ।
मंगलबार मात्रै अल नासरले रुडी गार्सियालाई बर्खास्त गरेको थियो। साउदी प्रो लिगमा निरन्तर कमजोर प्रदर्शन गरेसँगै अल नासरले रुडी गार्सियालाई प्रशिक्षक पदबाट बर्खास्त गरेको हो। साउदी प्रो लिगको उपाधि दौडमा अल नासर ३ अंकले पछि परेको छ। मात्र ७ खेल खेल्न बाँकी रहेको अवस्थामा अल नासरले नयाँ प्रशिक्षकलाई क्लबको जिम्मेवारी दिन चाहेको छ।
रोनाल्डोको सुझावसंगै अल नासरले जिदान भित्र्याउने प्रयास सुरु गरिसकेको विभिन्न खेल मिडियाहरुले जनाएका छन्। अल नासरले जिदानका अलावा जोसे मोरिन्होलाई पनि आफ्नो सूचीमा राखेको छ। रोनाल्डो जसले दुबै प्रबन्धकहरू अन्तर्गत खेलेका छन्, जिदानको सम्भावित नियुक्तिको बारेमा छलफलमा संलग्न छन्।
यद्यपि अल नासर र रोनाल्डोले जिदानलाई क्लबको प्रशिक्षकको रुपमा भित्र्याउन चाहेको भएपनि फ्रान्सेली लिजेन्ड जिदानले अल नासरको जिम्मेवारी सम्हाल्ने कम सम्भावना रहेको बताइन्छ। फ्रेन्च प्रशिक्षक गार्सियाले भने आपसी सहमतिमा क्लब छाडेको साउदी प्रो लिग क्लबले जनाएको छ ।
पछिल्लो समय फरवार्ड क्रिस्टियानो रोनाल्डोसँग गार्सियाको सम्बन्ध राम्रो थिएन । हालै रोनाल्डो र गार्सियाबीच झगडा भएको चर्चा चलेको थियो । गार्सिया २०२२ को जुनमा अल नसरको मुख्य प्रशिक्षक नियुक्त भएका थिए । ५९ वर्षीय गार्सियाले रोमा, मार्से, लिल र लियोन लगायतका टोली हेरिसकेका थिए ।
