७ वैशाख , एजेन्सी ।
रमजानको पवित्र महिना चलिरहँदा यमनको राजधानीवासीका लागि भने यो महिना शोकको महिना बन्न पुगेको छ । यमनको राजधानी सानामा रमजानको अवसरमा नगद उपहार वितरण गरिरहँदा मच्चिएको भागदौडमा दर्जनौँले ज्यान गुमाएपछि यतिबेला साना शोकमा डुबेको छ ।
सानाको एउटा विद्यालयमा रमजानको समयमा सहयाता सामग्री वितरण भइरहँदा मच्चिएको भागदौडमा कम्तीमा ७८ जनाले ज्यान गुमाएको बीबीसीले जनाएको छ । सामाजिक सञ्जालमा राखिएका भिडिओ फुटेजमा पनि शहरको बाब अल यमन क्षेत्रमा अस्तव्यस्त दृश्य देख्न सकिन्छ ।
रोयटर्स समाचार संस्थाले प्रत्येक व्यक्तिलाई दिन खोजिएको ९ डलर अर्थात् लगभग १२ सय रुपियाँ सहयोग लिन सयौँ मानिसहरू भेला भएका थिए । सन् २०१५ मा सरकारलाई लखेटेपछि हुथी विद्रोहीहरूले उक्त शहरमा शासन गर्दै आएका छन् । उक्त सहयोग वितरणका लागि जिम्मेवार व्यक्तिहरूलाई पक्राउ गरिएको छ र एउटा छानबिन अघि बढाइएको आन्तरिक मामिला मन्त्रालयले जनाएको छ ।
धेरैजना घाइते भएका छन् र १३ जनाको अवस्था गम्भीर रहेको सानास्थित एक जना स्वास्थ्य अधिकारीले जनाएका छन् । एक जना हुथी सुरक्षा अधिकारीले एएफपी समाचार संस्थालाई दिएको जानकारी अनुसार ज्यान गुमाउनेमा महिला र बालबालिका छन् ।
एसोसिएटेड प्रेस समाचार संस्थाले दुई जना प्रत्यक्षदर्शीलाई उद्धृत गर्दै हुथी लडाकुहरूले भीड नियन्त्रणको प्रयासमा हवाई फायर गरेको र गोली बिजुलीको तारमा लाग्दा विस्फोटन भएको जनाएका छन् । उनीहरूका भनाइमा त्यसले मानिसहरू आत्तिएका थिए र भागदौड अनि किच्चिने अवस्था निम्तिएको थियो ।
सन् २०१५ देखि चर्किएको द्वन्द्वले यमनमा ठूलो विध्वंश निम्त्याएको छ । त्यसबेला हुथीहरूले देशको पश्चिमतर्फको ठूलो भाग आफ्नो नियन्त्रणमा लिएका थिए । राष्ट्रपति अबेदरुबो मन्सुर हादी देश छाडेर भागेका थिए भने साउदी नेतृत्वको अरब राज्यहरूको गठबन्धनले उनको शासन स्थापित गर्न हस्तक्षेप गरेको थियो ।
तर वर्षौँदेखि त्यहाँको लडाइँमा गतिरोध कायम छ । युद्धले डेढ लाख भन्दा बढी मानिसको ज्यान लिएको छ भने देशको जनसङ्ख्याको तीन चौथाइ अर्थात् करिब २ करोड ३० लाख मानिसहरूले कुनै न कुनै किसिमको सहायता लिनुपर्ने अवस्था छ ।
