१५ बैशाख,काठमाण्डौ ।
काठमाडौंमा जारी एसीसी प्रिमियर कपको नेपाल र कुवेतबीचको सेमिफाइनल खेल टियु मैदान कीर्तिपुरमा हुने भएको छ । नेपाल क्रिकेट संघ (क्यान)का कार्यवाहक सचिव दुर्गाराज पाठकले नेपालको सेमिफाइनल टियुमा हुने पक्का भएको जनाएका छन् ।
कुवेतले समूह बी को निर्णायक खेलमा हङकङलाई ३० रनले हराएपछि सेमिफाइनलमा घरेलु टोली नेपालसँगको भेट पक्का गरेको थियो । नेपाल र कुवेतबीचको सेमिफाइनल खेल शनिबार टियु मैदानमा हुनेछ । नेपाल समूह ए को विजेता र कुवेत समूह बी को उपविजेताको रुपमा सेमिफाइनल खेल्ने भएका हुन् ।
त्यस्तै दोस्रो सेमिफाइनल खेलमा समूह ए को उपविजेता ओमान र समूह बी को विजेता युएईबीच प्रतिस्पर्धा हुनेछ । दोस्रो सेमिफाइनल भने मुलपानी मैदानमा हुनेछ । योसँगै मुलपानी मैदानले पनि एकदिवसीय अन्तराष्ट्रिय (ओडिआई) मान्यता पाएको छ । यसै प्रतियोगिताबाट नेपालले मुलपानीमा पहिलो अन्तर्राष्ट्रिय खेल आयोजना गरेको थियो ।
युएई र ओमान दुबै ओडिआई मान्यता देश हुँदा मुलपानीले पनि ओडिआई मान्यता पाउने भएको हो । नेपाल क्रिकेट संघ (क्यान) का कार्यवाहक सचिव पाठकले ओमान र युएईबीचको खेलसँगै ओडिआई मान्यता पाउने बताएका हुन् । मुलपानी ओडिआई मान्यता पाउने नेपालको दोस्रो मैदान हुनेछ ।
पहिलो ओडिआई मान्यता टियु मैदानले पाएको थियो । यसै प्रतियोगितामा सिंगापुर र हङकङबीच मुलपानीमा पहिलो अन्तर्राष्ट्रिय खेल भएको थियो । एसीसी प्रिमियर कपमा समूह चरणका १० खेल मुलपानीमा सम्पन्न हुनुपर्नेमा नेपाल र साउदी अरेवियाबीचको खेल भने वर्षाको कारण हुन सकेको थिएन ।
मुलपानी ओडिआई मान्यता पाउने विश्वको २ सय १६ औं मैदान बन्नेछ । दुई सेमिफाइनलका विजेताबीच सोमबार फाइनल खेल रहेको छ । फाइनलको विजेता टोली एसिया कपका लागि छनोट हुनेछ । एसिया कप आगामी सेप्टेम्बरमा आयोजना हुनेछ । यस्तै शीर्ष तीनमा रहने टोली एसीसी ईमर्जिङ कपका लागि छनोट हुनेछन् ।
