२२ वैशाख , एजेन्सी ।
रुसी राष्ट्रपति भ्लादिमिर पुटिनलाई एकपछि अर्को झड्का लाग्न थालेको छ । केही दिनअघि उनको हत्याको प्रयास गरिएको थियो । बुधबार ड्रोन आक्रमण गरी राष्ट्रपति भ्लादिमिर पुटिनको हत्या प्रयास भएको दाबी रुसले गरेको थियो । यसका लागि उसले पहिला किभ र पछि अमेरिकामाथि आरोप लगाएको छ ।
तर किभ र वासिंटन दुवैले यसलाई अस्वीकार गरेका छन् । यसैबीच पुटिनलाई वाग्नर समूहबाट पनि धम्की आउँन थालेको छ । रुसको निजी सैन्य कम्पनी वाग्नर ग्रुपका मालिकले युक्रेनी सहर बाख्मुटबाट बुधबारसम्म आफ्ना सेना फिर्ता गर्ने धम्की दिएका छन् । रुसी रक्षा मन्त्रीलाई हतियार एवं गोलावारुद लगायतको आपूर्ति बढाउन आग्रह गर्दै उनले यस्तो घोषणा गरेका हुन् ।
यसअघि वाग्नर ग्रुपका मालिकले ज्यान गुमाएका मृत लडाकुको शवको बीचमा हिँडेको भिडियो सामाजिक सञ्जालमा पोस्ट गरेका थिए । वाग्नरका मालिक येभगेनी प्रिगोजिनले पछिल्ला हप्ताहरूमा रूसी सरकारप्रति क्रोधपूर्ण अभिव्यक्ति राख्दै आएका छन् । “तिमीहरू आफ्नो रेडवुड क्याबिनेटमा जुवा खेल्न सक्नु भनेर यिनीहरू मरिरहेका छन्,” उनले सरकारलाई सम्बोधन गर्दै भनेका थिए ।
उनले मे १० मा सेना त्यहाँबाट बाहिरिने भनेका छन् । बाख्मुट युक्रेनको कनेक्टिभिटी र पूर्वाधारलगायतका हिसाबले महत्वपूर्ण सहर हो । लामोसमयदेखि यो सहर कब्जा गर्न रुसी सेनाले युक्रेनी सेनासँग लडिरहेको छ । रुसका लागि बाख्मुटको लडाँइमा वाग्नर समुहले महत्वपूर्ण भूमिका खेलेको छ । यदि वाग्नर समूहका सेना यहाँबाट बाहिरिए भने रुसी राष्ट्रपति भ्लादिमिर पुटिनका लागि यो एक घाटा हुने ठानिएको छ ।
