१९ जेठ, एजेन्सी ।
विश्व चर्चित अर्जेन्टिनी खेलाडी लियोनल मेसीले फ्रान्सेली क्लब पेरिस सेन्ट जर्मेन छाड्ने पक्का भएको समाचार आइरहँदा उनीसंगै करिम बेन्जेमा र लुका मोड्रिच लगायत पनि अब साउदी अरब आउँने चर्चा चुलिएको छ ।
यसैलाई लक्षित गर्दै पोर्चुगलका कप्तान क्रिस्टियानो रोनाल्डोले साउदी प्रो लिगले अन्य ठूला नामलाई आकर्षित गर्न सके यो ‘विश्वकै शीर्ष पाँच ठूलो लिग’मध्ये एक बन्न सक्ने बताएका छन् । ३८ वर्षीय रोनाल्डोले मेसी, मोड्रिच, बेन्जेमाहरुलाई साउदी प्रो लिगमा ‘न्यानो स्वागत’ रहेको समेत बताएका छन् ।
पाँच पटकको बालोन डी’अर विजेता ३८ वर्षीय रोनाल्डोले प्रो लिगकै क्लब अल नासरबाट एक सिजन पूरा गरिसकेका छन् । उनी गत डिसेम्बरमा अल नासरसँग जोडिएका थिए । क्लबसँग सन् २०२५ सम्म सम्झौता रहेको रोनाल्डोले आगामी सिजन पनि साउदी बसाईलाई निरन्तरता दिने स्पष्ट पारे ।
पीएसजीले ३५ वर्षीय मेसीले सिजनको अन्त्यसँगै क्लब छोड्ने पुष्टि गरिसकेको छ । मेसी साउदी अरेबियाका पर्यटन दूतसमेत हुन् । करिअरको उत्तरार्धमा रहेका रोनाल्डोका पूर्व सहकर्मीद्वय बेन्जेमा र मोड्रिच पनि पछिल्लो समय साउदीको क्लबसँग जोडिएको चर्चा सार्वजनिक भएको छ ।
“यदी उनीहरू आउँदै छन् भने, ठूला नाम र खेलाडीहरू । उनीहरूलाई यहाँ धेरै स्वागत छ । किनभने उनीहरू यहाँ आउदा लिगको स्तर अझ केही बढ्नेछन्,” ३८ वर्षीय रोनाल्डोले भने, “यहाँको लिग निकै राम्रो छ । तर, अझै धेरै अवसरहरूमा अघि बढ्न आवश्यक छ । लिग प्रतिस्पर्धात्मक छ । टिम पनि राम्रा छन् र अरबी खेलाडी पनि ।”
गत नोभेम्बरमा म्यानचेस्टर युनाइटेडसँगको दोस्रो सहकार्य टुटेपछि रोनाल्डो अल नासर अनुबन्धित भएका थिए । रोनाल्डोले अल नासरका लागि लिगमा १६ खेल खेल्दा १४ गोल गरेका छन् ।
रोनाल्डोको यही प्रदर्शनका कारण अल नासरले प्रो लिगमा दोस्रो स्थान हासिल गरेको थियो । अल नासरलाई पछि पार्दै अल इतिहाद लिग च्याम्पियन बनेको थियो ।
