२१ जेठ, एजेन्सी ।
लियोनल मेसी र सर्जियो रोमासले शनिबार फ्रान्सेली लिग वानमा पेरिस सेन्ट जर्मेन (पीएसजी) का लागि आफ्नो अन्तिम खेल खेलका छन् । त्यसमा लिग च्याम्पियन भइसकेको पीएसजी पराजित रह्यो । दुई गोलको अग्रता जोगाउन नसक्दा पिएसजी घरेलु मैदानमा क्लेरमन्टफटसँग ३–२ ले पराजित भएको हो ।
क्लेरमन्टफटको जितमा जोहान गास्टिन, मेदी जिफेन र ग्रिजोन केयईले गोल गरे । पिएसजीका सर्जियो रामोस र केलियन एमबाप्पेको गोल सान्त्वना बन्यो । पार्क डेस प्रिन्सेसमा शनिबार राति भएको खेलको पाँचौं मिनेटमा ग्रिजोन केयईको गोलले मान्यता पाएन । १६औं मिनेटमा रामोसले गोल गर्दै पिएसजीलाई १–० को अग्रता दिलाए ।
उनले भिटिन्हाको पासमा गोल गर्न सफल भएका थिए । २१औं मिनेटमा एमबाप्पेले पेनाल्टीमा गोल गर्दै पिएसजीको अग्रता दोब्बर पारे । एलिडु सेइडुले पेनाल्टी बक्समा अचरफ हाकिमीलाई फउल गरेपछि प्राप्त पेनाल्टीमा एमबाप्पे चुकेनन् । तर, त्यो दुई गोलको अग्रतालाई पिएसजीले जोगाउन सकेन ।
२४औं मिनेटमा जोहानले गोल गर्दै खेललाई २–१ को स्थितिमा ल्याए । ३७औं मिनेटमा ग्रिजोन केयई पेनाल्टीमा चुक्दा क्लेरमन्ट फुर्ट बराबरीबाट चुक्यो । पहिलो हाफको इन्ज्युरी समयमा मेदी जिफेनले गोल गर्दै खेललाई २–२ गोलको बराबरीमा ल्याए । त्यसपछि ६३औं मिनेटमा ग्रिजोन केयईले गोल गर्दै क्लेरमन्ट फुर्टलाई ३–२ को अग्रता दिलाए ।
त्यसपछि थप गोल निस्कन नसक्दा पिएसजी पराजित हुन पुग्यो । रामोस र मेसीले पिएसजीका लागि अन्तिम खेल खेल्दा जित निकाल्न सकेन । रामोस र मेसीले यो सिजनको अन्त्यसँगै पिएसजी छाड्ने निर्णय गरिसकेका छन् । यस हारका बावजुत पिएसजी फ्रेन्च लिग वानको च्याम्पियन भने बनिसकेको छ ।
पिएसजीको ३८ खेलबाट ८५ अंक पुगेको छ । समान खेलबाटै लेन्सले ८४ अंक बटुल्यो । पिएसजीलाई हराएको क्लेरमन्ट फुर्ट ५९ अंक जोडेर आठौं स्थानमा रह्यो ।पिएसजी र लेन्सले अर्काे सिजनको च्याम्पियन्स लिग खेल्नेछ ।
मार्सेले च्याम्पियन्स लिगको छनोट खेल्नेछ । रेनेसले युरोपा लिग तथा लिलले युरोपा कन्फ्रेन्स लिगको छनोट खेल्नेछ । अक्सर, एसी एजासियो, ट्रोएस र एन्जर्स यो सिजन लिग वानबाट रेलिगेसनमा परेका छन् ।
