२२ जेठ, एजेन्सी ।
इटालियन क्लब एसी मिलानका ज्लाटन इब्राहिमोविचले ४१ वर्षको उमेरमा आइतबार फुटबलबाट संन्यास लिएका छन् । यससँगै उनको सफल फुटबल खेल जीवनमा पूर्णविराम लागेको छ । इटालीको सिरी ए मा मिलानका लागि अन्तिम खेल खेल्दै उनले भनेका छन्, ‘मैले फुटबलसँग बिदा लिएको छुं ।’
सिजनको अन्तिम दिनको खेलमा मिलानले भेरोनालाई ३–१ ले हरायो । उनले आफ्नो खेल जीवनमा ५ सय ११ गोल गरे । चार देशमा लिग उपाधि जित्ने क्रममा स्विडेनी खेलाडीले इन्टर मिलान, पेरिस सेन्ट जर्मेन र म्यानचेस्टर युनाइटेडका लागि खेले । यस क्रममा उनले कुल ३४ उपाधि हात पारे ।
इब्राहिमोविच स्विडेनका लागि सबैभन्दा बढी गोल गर्ने खेलाडी पनि हुन् । उनले आफ्नो देशका लागि ६२ गोल गरेका छन् । इब्राहिमोभिचले यसअघि नै इटालियन क्लब छाड्ने घोषणा गरिसकेका थिए । इब्राहिमोभिकले सन् २०२० को शुरुमा एसी मिलानसँग आफ्नो दोस्रो स्पेल सुरु गरेका थिए ।
त्यसअघि उनले सन् २०११ देखि मिलानमा खेलेका थिए । लगातार चोटका कारण उनले यो सिजन चार खेल मात्रै खेले । यस अवधिमा उनले सिरी ‘ए’ मा एक खेलमा पहिलो रोजाईमा खेल्दा एक गोल गरेका छन् । यता करिम बेन्जेमाले रियल म्याड्रिडका लागि आफ्नो अन्तिम खेलमा आइतबार पेनाल्टीबाट एक गोल गरे ।
त्यसको मदतले स्पेनी ला लिगामा रियलले एथलेटिको बिलबाओसँग १–१ को बराबरी खेल्यो । उनी रियलका लागि सर्वाधिक गोल गर्ने खेलाडी सूचीको दोस्रो स्थानमा छन् । यसअघि रियलले बेन्जेमाले १४ वर्षको बसाईपछि क्लब छाड्ने घोषणा गरेको थियो । सम्भवतः फ्रान्सेली खेलाडीको अबको गन्तव्य साउदी अरेबिया हुनेछ ।
यस हप्ताको सुरुमा बेन्जिमाले अल इतिहाद जाने योजना बनाएका बताइएको थियो । उनलाई अल इतिहादबाट दुई वर्षका लागि ४३९ मिलियन डलरको प्रस्ताव आएको बताइएको थियो । बेन्जेमा सन् २००९ मा रियल मड्रिडमा आबद्ध भएका थिए ।
उनले तीन सय ५३ गोल गरेका छन् । रियलबाट सर्वाधिक गोलकर्ता क्रिन्टियानो रोनाल्डोले चार सय ५० गोल गरेका छन् । बेन्जेमाले ला लिगा चार पटक, च्याम्पियन्स पाँच पटक र सन् २०२२ मा बालेन जिओर जितेका छन् ।
