२३ जेठ, एजेन्सी ।
अमेरिकी बहुराष्ट्र कम्पनी एप्पलले बहुप्रतिक्षित मानिएको ‘रियालिटी हेडसेट – एप्पल भिजन प्रो’ सार्वजनिक गरेको छ । यो पछिल्लो एक दशकमा एप्पलले लन्च गरेको हार्डवेयर पनि हो । एप्पलका प्रमुख कार्यकारी अधिकृत टिम कुकले नयाँ हेडसेट वास्तविक संसार र भर्चुअल संसारको मिश्रण रहेको बताएका छन् ।
कम्पनीले आइफोनको नयाँ अपरेटिङ सिस्टमसँगै म्याकबुक एयरमा नयाँ अपडेटको समेत घोषणा गरेको छ । रियालिटी हेडसेटको मूल्य ३ हजार ४९९ अमेरिकी डलर अर्थात करिब ४ लाख ६१ हजार नेपाली रुपैयाँ रहेको छ । दुई घण्टा ब्याटरी लाइन रहने यो हेडसेट अमेरिकामा अर्को वर्षसम्ममा ‘लन्च’ हुनेछ ।
एप्पलको यो हेडसेटको मूल्य बजारमा उपलब्ध अन्य भर्चुअल रियालिटी हेडसेटभन्दा महँगो हो । गत हप्ता मेटाले ४९९ डलर (करिब ६५ हजार नेपाली रुपैयाँ) पर्ने ‘द क्वेस्ट हेडसेट’ घोषणा गरेको थियो । एप्पलको ‘भिजन प्रो हेडसेट’ बजारमा उपलब्ध अन्य हेडसेटभन्दा भिन्न देखिन्छ । एप्पलले आफ्नो डिभाइसलाई ‘अगमेन्टेड रियालिटी’ भनेको छ ।
‘अगमेन्टेड रियालिटी’ले स्क्रिनमार्फत वास्तविक संसारसँग भर्चुअल संसारलाई संयोजन गर्ने बताइएको छ । एप्पलको भिजन प्रो बजारमा रहेका यस्तै अन्य हेडसेटभन्दा केही अलग छ। हेर्दा यो डिभाइस भर्चुअल रियालिटी हेडसेट भन्दापनि स्किइङ गगल्स बढी देखिन्छ। एप्पलले यो नयाँ डिभाइसको विवरण दिँदै ‘अगमेन्टेड रियालिटी’को प्रयोग गरेको छ। ‘अगमेन्टेड रियालिटी’ अर्थात् सम्बधित वास्तविकता एउटा यस्तो प्रविधि हो, जसमा हाम्रो आसपासको दुनियामा भर्चुअल चिजहरु राखिन्छ।
यस्तोमा एक स्क्रिनको माध्यमबाट हेर्दा मिल्दोजुल्दो वास्तविकता देखिन्छ, जसमा वास्तविक चिजका अतिरिक्त भर्चुअल चिज पनि हुन्छन्। युजरले एउटा भर्चुअल दुनियामा फिल्म देख्न सक्छन्, एपको प्रयोग गर्न सक्छन् या दस्ताबेज लेख्न सक्छन्। तर अहिलेसम्म यस्तो प्रकारको प्रविधिको लागि कुनै ठूलो बजारको उपलब्धताको प्रमाण भने नरहेको अन्तराष्ट्रिय संचारमाध्यामहरुले उल्लेख गरेका छन् ।
यो डिभाइलाई हात, आँखा तथा आवाजबाट नियन्त्रित गर्न सकिने कम्पनीले जनाएको छ। उदाहरणका लागि, हातको औंला छुँदा वा हल्लाउँदा कन्टेन्टलाई स्क्रोल गर्न सकिन्छ। मेटा तथा लेनोभोले भर्चुअल रियालिटी हेडसेटको नयाँ संस्करण सार्वजनिक गरेको हप्तादिनपछि मात्रै एप्पलले यो घोषणा गरेको हो।
