२३ जेठ, एजेन्सी ।
अमेरिकी इतिहासकै सबैभन्दा खतरनाक जासुस भनेर चिनिने रोबर्ट ह्यान्सन मृत फेला परेका छन् । एफबीआईका पूर्व एजेन्ट ह्यान्सन कालोराडोस्थित जेलभित्र मृत फेला परेका बीबीसीले जनाएको छ । ७९ वर्षीय ह्यान्सनको मृत्युको कारण पुष्टि हुन सकेको छैन । अमेरिकी जाँच एजेन्सी एफबीआईको एजेन्ट हुँदाहुँदै रुसको लागि जासुसी गरेको आरोप उनीमाथि थियो ।
१२ जनवरी १९७६मा एफबीआई अफिसरको रुपमा काम गरेका ह्यान्सनले करिब २० वर्षसम्म रुसको लागि जासुसी गरेका थिए । यो अवधिमा रुसले ह्यान्सनको खातामा १४ लाख डलरभन्दा बढी रकम ट्रान्सफर गरिदिएको र हिरा दिएको बीबीसीमा उल्लेख छ । सन् १९९४ मा एफबीआईले जासुस एल्ड्रिच हेजेन एम्सलाई पक्राउ गरेपछि ह्यान्सनको पनि संलग्नता खुलेको थियो ।
यो कुराको पुष्टि भएपछि अदालतले उनलाई सन् २००२ मा आजीवन काराबासको सजायँ सुनाएको थियो । यसैबीच यता अमेरिकाको दक्षिणपूर्वी राज्य म्यासाच्युसेटस्मा रहेको १६० वर्ष पुरानो चर्च जलेर नष्ट भएको छ । चट्याङका कारण चर्चमा आगलागी भएको अग्नि नियन्त्रणक प्रमुख रोबर्ट पारासनले बताएका छन् । आगलागीबाट कुनै मानवीय क्षति भने भएको छैन ।
रिपोर्टअनुसार उक्त चर्च काठ र अन्य सामग्रीबाट बनेको थियो । स्थानीय समय अनुसार शुक्रबार दिउँसो चट्याङ खसेपछि आगोले चर्चलाई समातेको थियो । सामाजिक सञ्जालमा प्रसारित भिडिओमा चर्चको स्टिपल आगोले खसेको देखिएको छ ।
अग्नि नियन्त्रणक प्रमुख रोबर्ट पारासनले बताए अनुसार आगोले जलेर चर्च पूर्ण रूपमा नष्ट भएको छ । आगलागीपछि राज्यका २० विभागका १ सय अग्निनियन्त्रकलाई खटाइएको थियो । उक्त क्षेत्रमा सन् १७ सयको दशकदेखि चर्चहरू रहेको बताइएको छ, जसमध्ये एक महत्वपूर्ण चर्च सन् १८६२ मा आगो लागेर नष्ट भएको थियो ।
