२ असार, एजेन्सी ।
घरेलु टोली बंगलादेशले एकमात्रै टेस्ट खेलमा अफगानिस्तानलाई ५४६ रनको विशाल अन्तरले पराजित गरेको छ । जितको लागि ६६२ रनको विशाल विजयी लक्ष्य पछ्याएको अफगानिस्तान ११५ रनमा अल आउट भयो । अफगानिस्तका रहमात शाहले सर्वाधिक ३० रन बनाए । कप्तान हश्मातुल्लाह शाहिदीले १३ र करिम जन्नत १८ रनमा आउट भए ।
अन्य कुनैपनि अफगानी ब्याटरले दोहोरो अंकमा रन बनाउन सकेनन् । तस्किन अहमदले चार र शोरिफुल इस्लामले तीन विकेट लिए । बंगलादेशले दोस्रो इनिङमा ४२५–४ को अवस्थामा इनिङ समाप्तिको घोषणा गर्यो । नाज्मुल हसन शान्टोले १५१ बलमा १५ चौकासहित १२४ रनको शतकीय इनिङ खेले ।
मोमिनुल हकले १४५ बलमा १२ चौका र १ छक्कासति १२१, लिटन दास ६६ र जकिर हसनले ७१ रन बनाए । अफगानिस्तानका जाहिर खानले सर्वाधिक दुई विकेट लिए । अफगानिस्तान पहिलो इनिङमा १४६ रनमा अल आउट भएको थियो । अफगानिस्तानका नासिर जमलले ३५ र अफ्सार जजाईले सर्वाधिक ३६ रन बनाए ।
बंगलोदशका एबादोत हुसैनले सर्वाधिक चार, शोरिफुल इस्लाम, ताइजुल इस्लाम र मेहदी हसन मिराजले समान दुई विकेट लिए । त्यसअघि मिरपुरमा टस हारेर पहिला ब्याटिङको निम्तो पाएको बंगलोदश ३८२ रनमा अल आउट भएको थियो । बंगलादेशका नाज्मुल हसन शान्टोले १७५ बलमा २३ चौका र २ छक्कासहित सर्वाधिक १४६ रन बनाए ।
दुबै इनिङमा शतक हानेका शान्टो खेलको प्लेयर अफ द म्याच चुनिए । अफगानिस्तानका निजात मसुदले सर्वाधिक पाँच विकेट लिएका थिए । अफगानिस्तानलाई ५४६ रनले हराएर बङ्लादेशले आफ्नो टेष्ट इतिहासको सबैभन्दा फराकिलो अन्तरको जितको रेकर्ड बनाएको हो । यस्तै, टेष्ट क्रिकेटमा यो अहिलेसम्म तेस्रो ठूलो अन्तरको जित हो ।
