२ असार, एजेन्सी ।
आइतबारदेखि जिम्बावेमा आइसिसी एकदिवसीय विश्वकप छनोट प्रतियोगिता सुरु हुँदैछ । जहाँ नेपालले आइतबार नै आफ्नो पहिलो खेल घरेलु टिम जिम्बाब्वेसँग खेल्नेछ । समूह ‘ए’ मा रहेका नेपाल र घरेलु टोली जिम्बाब्वेबीचको खेल हरारे स्पोर्ट्स क्लबमा नेपाली समयअनुसार दिउँसो १२ः४५ बजेबाट सुरु हुनेछ ।
जिम्बाब्वेविरुद्ध मैदानमा उत्रँदा नेपालले एकदिवसीय अन्तर्राष्ट्रियमा पहिलो पटक टेस्ट राष्ट्रको सामना गर्नेछ । नेपालले यसअघि एकदिवसीय अन्तर्राष्ट्रियमा कुनै पनि टेस्ट राष्ट्रविरुद्ध खेल्ने अवसर पाएको थिएन । त्यसैले जिम्बाब्वेविरुद्धको खेल नेपालका लागि ऐतिहासक पनि हुनेछ ।
यसअघि सन् २०१८ मा जिम्बाब्वेमै भएको विश्वकप छनोटमा नेपालले आयोजक जिम्बाब्वेविरुद्ध खेलेपनि नेपालसँग एकदिवसीय अन्तर्राष्ट्रिय मान्यता नभएका कारण उक्त खेल ‘लिस्ट ए’ खेलको रुपमा मात्र रहेको थियो । नेपालले उक्त खेल ११६ रनले हारेको थियो । यसै वर्ष भारतमा हुने विश्वकप प्रतियोगिताका लागि छनोट हुन विश्वका १० टिम यतिबेला जिम्बाव्बे पुगेका छन् ।
जसमा समूह ए मा नेपाल, जिम्बाब्वे, वेष्टइन्डिज, नेदरल्यान्ड्स र अमेरिका छन् । समूह बी मा श्रीलंका, आयरल्यान्ड, स्कटल्यान्ड, यूएई र ओमान छन् । समूह चरणको खेलबाट शीर्ष तीनमा रहने टिम सुपर सिक्समा पुग्नेछन् । सुपर सिक्सबाट शीर्ष दुईमा रहने टिम भारतमा हुने विश्वकपका लागि चयन हुनेछन् ।
सुपरसिक्समा पुग्ने लक्ष्य लिएको नेपालले दुई खेल जिते सुपरसिक्समा पुग्ने सम्भावना बलियो हुनेछ भने एक खेल जिते अरु खेलको नतिजामा भर पर्नुपर्नेछ । नेपाल पछिल्लो समय आफ्नो क्रिकेट इतिहासकै उच्च लयमा छ । नेपालले विश्वकप छनोटमा स्थान बनाउन आइसिसी विश्वकप लिग २ मा पछिल्ला १२ मध्य ११ खेल जितेको थियो ।
एसिसी प्रिमियर कपको उपाधि जित्दै एसिया कपमा भारत र पाकिस्तानसँग खेल्ने भएको छ । नेपालले पछिल्ला १७ मध्य १६ अन्तर्राष्ट्रिय प्रतियोगितामा जित हात पारेको छ । त्यसमध्य विदेशी भूमिमा चार खेल मध्य तीनमा जित र एकमा हार छ । तर पछिल्लो अभ्यास खेल हेर्दा घरेलु मैदान टियुमा सानदार प्रदर्शन गरेको नेपाललाई त्यहिँ लय जिम्बावेमा दोर्याउन सहज देखिदैन ।
नेपालले सानदार प्रदर्शन गर्दै विश्वकपको सुपर सिक्समा स्थान बनाउन टोलीमा भएका कमजोरी सुधार गर्नुपर्ने हुन्छ । नेपालले आइसिसी विश्वकप लिग–२ मा खेलेका पछिल्ला तीन सिरिज र प्रिमियर कपमा फिल्डिङमा कमजोर प्रदर्शन गरेको थियो । नेपालले थुप्रै खेलमा क्याच र रन आउटको अवसर छाडेको थियो । उक्त समस्या नेपालले सुधार गर्नुपर्ने हुन्छ ।
अर्कोतर्फ नेपालले ब्याटिङमा राम्रो सुरुवात गर्न सकेको छैन । नेपालले ओपनरमा कुशल भुर्तेल र आसिफ शेखलाई मैदान उतार्दै आएकोछ । नेपालले खेलेका पछिल्ला सबै अन्तर्राष्ट्रिय खेलमा ओपनरले ठूलो साझेदारी गर्न सकेका छैनन् । ओपनरले ब्यक्तिगत रुपमा उत्कृष्ट प्रदर्शन गरेका छन् । कुनै खेलमा कुशल र केहिमा आसिफले ठूला इनिङका साथ जित दिलाएका छन् ।
जिम्बावे तीव्र गतिका बलर सहयोगी मानिन्छ । नेपालले पहिलो रोजाईमा सोमपाल कामी र करण केसीलाई मैदान उतार्दै आएको छ । तर नेपालले तेस्रो तीव्र गतिका बलर पनि टुङ्गो लगाउन आवश्यक देखिन्छ । अकोतर्फ नेपालले पहिला ब्याटिङ गर्दा पनि संघर्ष गर्दै आएको छ । अभ्यास खेलमा नेपालले हारेका तीनै खेल पहिला ब्याटिङ गर्दा थियो ।
नेपालको लक्ष्य पछ्याउँदा राम्रो गर्दै आएको छ । पहिला ब्याटिङ गर्दा भने संयमित हुन आवश्यक छ । नेपाली ब्याटर फिनिसर गर्न पनि चुक्दै आएका छन् । राम्रो फिनिसिङ गर्न पनि त्यतिनै आवश्यक देखिन्छ । यस्तै नेपाली बलरले राम्रो सुरुवात गरेपछि मध्यक्रममा विपक्षी ब्याटरको साझेदारी ब्रेक गर्न सकेका छैन ।
मध्यक्रममा नेपालका स्पिनर सन्दीप लामिछाने बाहेक अन्य बलर विकेट लिन खासै सफल हुन सकेका छैनन् । जसले गर्दा खराब सुरुवातबाट पनि विपक्षीले राम्रो पूनरागमन गर्दै आएका छन् । मध्यक्रममा पनि नेपालले राम्रो विकेट लिन आवश्यक पर्दछ । बायाँ हाते तीव्र गतिका बलर र अर्थोड्रक्स स्पिनर नेपाललाई लगातार भारी बन्दै आएका छन् ।
नेपालले बायाँ हाते तीव्र र स्पिनर दुबै बलरविरुद्ध लगातार खराब प्रदर्शन गर्दै आएको छ । विश्वकप छनोटमा सबै टोलीमा स्तरिय बायाँ हाते बलर छन् । यस्तै नेपालको ठूलो कमजोरी नै डेथ ओभर हो । नेपालले डेथ ओभर अर्थात ४० देखी ५० ओभर सम्म लगातार खराब प्रदर्शन गर्दै आएको छ । टोलीमा डेथ ओभर स्पेलिष्ट बलर छैनन् ।
किशोर महतोले घरेलु प्रतियोगितामा राम्रो प्रदर्शन गरेपनि अन्तर्राष्ट्रियमा मौका पाउन सकेका छैनन् । नेपालका प्रमुख बलर सोमपाल, करण र सन्दीप तीनैको डेथ ओभरमा सबैले खराब प्रदर्शन गर्दै आएका छन् । त्यसैको कारण नेपालले डेथ ओभर समस्या समाधान गर्नुपर्ने हुन्छ । अन्यथा टेस्ट टोलीले नेपालविरुद्ध चौका र छक्काको वर्षा गराउँदै विशाल योगफल बनाउन सक्छन् ।
यसैबीच युवा कप्तान रोहित पौडेलले पनि नेपालले लामो समयदेखि विश्वकप छनोटका लागि तयारी गरिरहेको तथा यसका लागि नेपालले कडा मेहनत गरेको बताएका छन् । ‘विगत दुई वर्षदेखि हामीले यस प्रतियोगिताका लागि निकै मेहनत गरिरहेका थियौं र अन्ततः हामीले यो अवसर पाएका छौ,’ आईसीसीसँगको कुराकानीमा कप्तान रोहितले भने ।
रोहितले नेपालले पाएको अवसरलाई सदुपयोग गर्न चाहेको समेत बताएका छन् । ‘हामी यस अवसरलाई सम्मान गर्छौं र हामी यसको सक्दो सदुपयोग गर्न चाहन्छौ । हामी सबै राम्रा क्रिकेट राष्ट्रहरूसँग खेल्न पाउँदा धेरै उत्साहित छौ र प्रतियोगिताको लागि पर्खिरहेका छौ,’ उनले भने ।
यता जिम्बाब्वेका कप्तान क्रेग इर्भिनले पनि प्रतियोगिताका लागि जिम्बाब्वेको तयारी उत्कृष्ट भएको बताएका छन् । नेपालले दोस्रो खेल अमेरिकाविरुद्ध जुन २०, वेस्ट इन्डिजविरुद्ध जुन २२ तथा नेदरल्यान्ड्सविरुद्ध जुन २४ मा खेल्ने तालिका रहेको छ । आईसीसीले आज प्रतियोगितामा सहभागी सबै टिमका कप्तानहरूले ट्रफीसँगै लिएर खिचेको तस्वीर सार्वजिनक गरेको छ ।
