३ असार, एजेन्सी ।
विश्वकपको छनोट अन्तर्गत पहिलो खेलमा उत्कृष्ट सुरुवात गरेको नेपालले पहिलो विकेटका रुपमा कुशल भुर्तेललाई गुमाएको छ । शानदार ब्याटिङ गरेका कुशल किर्तिमानी शतकबा मात्र एक रनले चुकेका छन् । टेस्ट राष्ट्रविरुद्ध पहिलो शतकको खुशी मनाउन रहेका नेपालका समर्थकलाई जिम्बाबेका विलिङ्टन मासाकाद्जाले स्तब्ध बनाएका हुन् ।
उनले कुशललाई ९९ रनको अवस्थामा बोल्ड गरेका छन् । ९९ रन बनाएपनि कुशलको नाम अर्धशतकमा मात्रै समेटिएको छ । घरेलु टिम जिम्बावेले हरारे स्पोर्ट्स क्लबमा टस जितेर बलिङ रोजेपछि पहिले ब्याटिङ गरेको नेपालका ओपनर कुशलले ६३ बलमा अर्धशतक पूरा गरेका थिए । उनले ९९ रन जोड्दा १३ चौका र २ छक्का प्रहार गरे ।
कुशल टेस्ट टिमविरूद्ध एकदिवसीय खेलमा अर्धशतक प्रहार गर्ने नेपालका पहिलो ब्याटर बनेका छन्। यस्तै आसिफ शेख टेस्ट टिमविरूद्ध एकदिवसीय खेलमा अर्धशतक प्रहार गर्ने नेपालका दोस्रो ब्याटर बनेका छन् । उनले सय बलमा ६६ रन बनाएका छन् । ६६ रन जोड्दा उनले ७ चौका प्रहार गरेका छन् ।
यस्तै, आईसीसी विश्वकप छनोटको पहिलो खेलमा जिम्बाब्वेविरुद्ध नेपालको ओपनिङ जोडी आसिफ शेख र कुशल भुर्तेलले पहिलो विकेटका लागि कीर्तिमानी ब्याटिङ गरेका छन् । कुशल र आसिफले एकदिवसीय अन्तर्राष्ट्रिय क्रिकेटमा पहिलो विकेटका लागि अहिलेसम्मकै उच्च साझेदारी गरेका छन् ।
जोडीले सन् २०२२ को जुन १४ मा ओमानविरुद्ध ११४ रनको साझेदारी गरेका थिए । आज यो जोडीले १७१ रनको साझेदारी गरेका छन् । नेपाल र जिम्बाब्वेबीचकोे एकदिवसीय अन्तर्राष्ट्रिय क्रिकेटको यो पहिलो खेल हो । नेपालले यसअघि जिम्बाब्वविरुद्ध ५० ओभरको एकमात्र खेल खेलेको छ ।
लिस्ट ‘ए’ मान्यता रहेको उक्त खेलमा नेपाल ११६ रनले पराजित भएको थियो । आईसीसी क्रिकेट विश्वकप लिग–२ का पछिल्लो १२ मध्ये ११ खेलमा जितको नतिजा निकालेको नेपाल घरेलु टिमविरुद्ध पनि सोही लयलाई निरन्तरता दिने योजनामा छ । विश्वकप छनोटमा नेपालका लागि पहिलो खेलमा नै चुनौती छ।
आयोजक त्योमाथि टेस्ट टिम जिम्बावेविरुद्ध आज देखाउने खेलले प्रतियोगिताभर नेपालको खेललाई असर गर्नेछ। एकदिवसीय वरीयताको कुरा गर्ने हो भने जिम्बावे ११औं स्थानमा छ भने नेपाल १४औं स्थानमा छ। प्रतियोगिताका लागि दश दिन दक्षिण अफ्रिकामा तयारी गर्दा नेपालले स्कटल्यान्ड र नेदरल्यान्ड्ससँग अभ्यास खेल खेलेको थियो।
दुवै खेलमा खराब ब्याटिङ गर्दा नेपाल पराजित भएको थियो। १० टिमले भाग लिने प्रतियोगितामा नेपाल समूह ‘ए’ मा छ। समूहमा नेपालसहित दुई पटकको विश्व विजेता वेस्ट इन्डिज, आयोजक जिम्बावे, नेदरल्यान्ड्स र अमेरिका छन्। समूह ‘बी’ मा श्रीलंका, आयरल्यान्ड, स्कटल्यान्ड, ओमान र युएई रहेका छन्।
