१९ असार, एजेन्सी ।
मेटाले ट्वीटरको प्रतिस्पर्धी एप बिहीबारबाट लन्च गर्ने भएको छ । फेसबुकले ट्वीटरको प्रतिस्पर्धी एप ल्याउने तयारीसँगै एलन मस्कले ट्वीटरका प्रयोगकर्तालाई सीमित मात्रामा पोस्ट हेर्न मिल्ने भन्दै आफ्नो डेटा सुरक्षाको विषय उठाएका थिए ।फेसबुकको कम्पनी मेटाले ल्याउन लागेको एपको नाम थ्रेड्स राखिएको छ ।
एप स्टोरमा यसलाई प्रि–अर्डर गर्न सकिन्छ र इन्स्टाग्रामसँग लिंक गर्न सकिन्छ । सार्वजनिक भएका यसको स्क्रिनसटहरु हेर्दा ट्वीटरकै जस्तो लुक देखिन्छ । मेटाले थ्रेडसलाई ‘टेक्स्टमा आधारित संवादको एप’ भनेको छ । पछिल्लो समय मेटाका मालिक मार्क जुकरबर्ग र ट्वीटरका मालिक एलन मस्कबीचको द्वन्द्वका रुपमा थ्रेड्सलाई लिन सकिन्छ।
यी दुई चर्चित ‘साहु’ बीच गत महिना फाइट खेल्नेसम्मको बहस भएको थियो। ‘फिजिकल फाइट’ का लागि तयार भएको बताउने उनीहरुको प्रतिस्पर्धा चाहिँ भर्चुअल नै हुने देखिएको छ । ट्वीटरले शुल्क लिएर भेरिफाइड ब्याचका लागि प्रवर्द्धन गरिरहेको अवस्थामा फेसबुकले थ्रेड्स ल्याउन लागेको हो।
गत शनिबार मस्कले ‘डेटा स्क्र्यापिङ’ बाट बचाउनका लागि भ्युज संख्या निर्धारण गर्न परेको जनाएका थिए । त्यसलाई काउन्टर दिँदै मेटाको थ्रेडमा निःशुल्क हुने बताइएको छ र त्यसमा भ्यु असीमित रहने जनाइएको छ । ‘थ्रेड्समा समुदाय एकैसाथ आएर उनीहरुको चासोको विषयमा छलफल गर्न सक्नेछन्, जुन भोलिका दिन ट्रेन्डिङ हुनसक्छ,’ एप स्टोरले मेटाको नयाँ प्रडक्टबारे भनेको छ।
