१९ असार,एजेन्सी ।
विश्वका धनाढ्य एलन मस्कको कम्पनी स्पेस एक्सको लगानी भएको एलेफ एरोनोटिक्सले उड्ने कारको परीक्षणको अनुमति पाएको छ । क्यालिफोर्नियाको उक्त कार निर्माता कम्पनीले हालै एक विज्ञप्ति जारी गर्दै फ्लाइङ कार ‘मोडल ए’ का लागि संघीय उड्डयन प्रशासन FAA बाट उडान अनुमति पाएको जानकारी दिएको हो ।
कम्पनीले आफूलाई उड्ने कारको परीक्षणका लागि अनुमति पाउने पहिलो कम्पनी भएको समेत दाबी गरेको छ । अन्तर्राष्ट्रिय सञ्चार माध्यमसँग कुरा गर्दै एलेफका सीईओ जिम डिखोब्नीले भनेका छन्, “यसले हाम्रो समय बचत गर्न वातावरणलाई जोगाउन उत्तिकै मद्दत गर्छ । यो विमानका लागि एउटा सानो काम होला तर कारका लागि एक विशाल कदम हो ।”
एलेफका अनुसार एफएएले उक्त कम्पनीलाई केही सीमित क्षेत्रमा मात्र परीक्षण गर्नका लागि उडान अनुमति दिएको छ । एलेफ यस्तो कम्पनी हो जुन हाल आकाशमा उड्ने र जमिनमा गुड्ने कार निर्माणमा केन्द्रित छ । कम्पनीले यस्तो गाडी निर्माण गरेको दाबी गरेको छ जसलाई अहिलेको बाटोमा सहजै गुडाउन सकिन्छ ।
यस गाडीमा एक पटकमा दुई जनाले मात्र यात्रा गर्न सकिने बताइएको छ । सीईओ डिखोब्नीले गत डिसेम्बरमा सीएनबीसीलाई अन्तर्वार्ता दिँदै २०२५ सम्म उड्ने कार आकाशमा देख्न सकिने बताएका थिए । कम्पनीले आफूले उड्डयन अनुमति पाएको खबर सार्वजनिक गरेपछि एलेफको शेयर ४४ प्रतिशतले बढेको बिजनेस इन्साइडरले उल्लेख गरेको छ ।
एलेफ कारको उडान दायरा ११० माइल अर्थात १८० किलोमिटर र गुड्नका लागि यसको लगभग दोब्बर ३२० किलोमिटरको दायरा प्रस्ताव गरिएको छ । एलेफ अटोमोटिभले भनेको छ कि यो गाडी÷विमान पहिलो उड्ने गाडी हो जुन सार्वजनिक सडकमा चलाउन मिल्छ र सामान्य कार जस्तै पार्क गर्न मिल्छ। यो गाडी २०२५ को अन्त्यसम्ममा पहिलो डेलिभरीको साथ प्रत्येक गाडी ३ लाख डलरमा बिक्री हुनेछ।
