२० असार, काठमाण्डौ ।
जल तथा मौसम विज्ञान विभागका अनुसार हाल देशमा मनसुनी वायुको प्रभाव रहेको छ। आज (बुधबार) बिहानसम्म देशभर सामान्यदेखि पूर्ण बदली रहेको छ। कोशी, मधेस र लुम्बिनी प्रदेशका थोरै र बांकी प्रदेशका एक–दुई स्थानहरूमा हल्कादेखि मध्यम वर्षा भइरहेको छ । अहिले मधेस प्रदेशको सप्तरी जिल्लामा भारी वर्षा भइरहेको विभागले जनाएको छ।
कोशी नदीको जलाधार क्षेत्र रहेको सप्तरीको बरमझियामा पछिल्लो २४ घण्टामा १०४.६ मिलिमिटर वर्षा भएको छ। यस्तै, चुरिया नदीको जलाधार क्षेत्र सप्तरीको राजविराज विमानस्थल क्षेत्रमा पछिल्लो २४ घण्टामा १७६.८ मिलिमिटर वर्षा भएको छ।
बुधबार बिहानको मापनअनुसार कोशी, कन्काई, नारायणी, कर्णाली, महाकाली, बबई, पश्चिम सेती, कमला, बागमती, पूर्वी राप्ती र यसका सहायक नदीहरुको बहाब सतर्कता तहभन्दा तलै र सामान्य अवस्थामा रहेको विभागले जनाएको छ। विभागअन्तर्गतको बाढी पूर्वानुमान महाशाखाले बुधबार केही जिल्लामा भएर बहने नदीहरुमा आकस्मिक बाढी आउनसक्ने जनाएको छ।
इलाम, झापा, पाँचथर, सिराहा, सप्तरी, दोलखा, सिन्धुपाल्चोक, कैलाली, कञ्चनपुर, डडेल्धुरा, बैतडी, दार्चुला र आसपास भएर बहने केही स–साना नदीहरुमा बहाव उल्लेख्य बढ्ने तथा केहीमा आकस्मिक बाढीको जोखिम रहेको महाशाखाले जनाएको छ।
रसुवा, काभ्रेपलाञ्चोक, ललितपुर, नुवाकोट, गोरखा, लमजुङ, कास्की, पाल्पा, स्याङजा, डोटी र आसपास भइ बहने केही स–साना नदीहरुमा बहाव बढ्न सक्ने महाशाखाको पूर्वानुमान छ। यसैबीच नेकपा (एमाले)का अध्यक्ष एवम् पूर्वप्रधानमन्त्री केपी शर्मा ओलीले पार्टीको विपद् व्यवस्थापन विभागलाई मौसमको प्रतिकूल प्रभाव र सम्भावित स्थितिबारे जानकारी गराउन आग्रह गरेका छन् ।
सामाजिक सञ्जालमा लेख्दै उनले भनेका छन्, “बाढीपहिरोबारे सर्वसाधारणलाई पूर्वजानकारी गराउन र आवश्यक उद्धार तथा सहयोग कार्यका लागि तयारी अवस्थामा रहन आग्रह गर्दछु ।” उनले बाढी पहिरोको जोखिमबारे राज्यले आफ्ना निकायहरूलाई यथोचित परिचालन गरोस् भनेर ध्यानाकर्षण समेत गराएका छन् ।
उनले भने, “भारी वर्षाका कारण देशका विभिन्न भागमा बाढीपहिरोले जनधनको क्षति भएका खबरहरू आइरहेका छन् । पहिरोका कारण राजमार्गहरु अवरुद्ध हुने र यात्रुहरु प्रभावित हुने क्रम बढ्दै छ । त्यसप्रति उच्च सतर्कता अपनाउन, राजमार्गहरुमा ट्राफिक नियमको पालना गर्न म सबैमा अनुरोध गर्दछु ।”
