४ मंसिर,एजेन्सी ।
आयोजक भारतलाई उसकै घरमा हराउँदै अष्ट्रेलियाले आइसीसी एक दिवसीय विश्वकपको उपाधि पुनः छैटौं पटक कब्जा गरेको छ । आइतबार अहमदावादस्थित नरेन्द्र मोदी क्रिकेट रंगशालामा भारतलाई ६ विकेटले हराउँदै अष्ट्रेलिया च्याम्पियन बनेको हो । अष्ट्रेलियाले यसअघि १९८७, १९९९, २००३, २००७ र २०१५ मा उपाधि जितेको थियो ।
भारतले दिएको २४१ रनको लक्ष्य अष्ट्रेलियाले ३ विकेटको क्षतिमा ४३ ओभरमै पूरा गरेको थियो । अष्ट्रेलियालाई च्याम्पियन बनाउन ट्राभिज हेडले शतकीय पारी खेलेका थिए । उनले १३७ रन बनाएर आउट भएका थिए । १२० बल खेलेका उनले १५ चौका र ४ छक्का प्रहार गरेका थिए ।
त्यस्तै मार्नुसले अविजित अर्धशतकसहित ५८ रन र म्याक्स वेल २ रनमा अविजित रहे । त्यस्तै डेभिड वार्नर ७, मिचेल मार्स १५ र स्टिभ स्मिथ ४ रन बनाएर पेभेलियन फर्किएका थिए । त्यसअघि भारतले निर्धारित ओभरको खेलमा सबै विकेट गुमाएर २४० रन बनाएको थियो ।
अष्ट्रेलियाले टस जितेपछि ब्याटिङको निम्तो पाएको भारतका लागि केएल राहुल र विराट कोहलीले अर्धशतक प्रहार गरे । राहुलले ६६ र विराटले ५४ रन बनाएर आउट भएका थिए । त्यस्तै कप्तान रोहित शर्मा ४७, शुभम गिल ४, श्रेयस लैयर ४, रविन्द्र जडेजा ९, सूर्यकुमार यादव १८, मोहम्मद सामी ६, जसप्रित बुमराह १, कुल्दीप यादव १० र मोहम्मद सिराज ९ रनमा अविजित रहे ।
भारतीय खेलाडी पहिलो इनिङ सकिँदै निराश देखिन्थे । उनीहरूले सोचेजस्तो रन बनाउन सकेका थिएनन् । जुन स्कोरमा रक्षा गर्न चुनौती भएको उनीहरूको मुहारले देखाउँथ्यो । यस्तै भारतीय बलरहरुले समेत हिजोको खेलमा आफ्नो जादु देखाउन सकेनन् । कम स्कोरमा बलरबाट आशा गरिएपनि विकेट पतन हुन् नसक्नु नै भारतको हारको मुख्य कारण बन्यो ।
अष्ट्रेलियाली ब्याटरसामू भारतीय स्टार बलरहरु पनि फिका बनेका थिए । यसपटक भारतलाई बलियो दाबेदारको रूपमा हेरिए पनि तेस्रोपटक उपाधि जित्न भारत चुकेको छ । भारतले यसअघि १९८३ र २०११ मा विश्वकपको उपाधि जितेको थियो । अस्ट्रेलियासँग हारेपछि भारतीय क्रिकेट फ्यान निकै निराश भएका छन् ।
भारतीय फ्यानले यो रुनुपर्ने विषय भएको प्रतिक्रिया दिएका छन् । भारतीय टोलीले ठूलो विश्वास तोडेको उनीहरूले बताएका छन् । यता भारतीय प्रधानमन्त्री नरेन्द्र मोदीले भने भारतीय क्रिकेट टिमको प्रशंसा गरेका छन् । मोदीले विश्वकपमा भारतले सम्झनयोग्य प्रदर्शन गरेको बताएका छन् । उनले भारतीय खेलाडीहरूको सिप र संकल्पको प्रशंसा गरेका छन् ।
मोदीले पूरै राष्ट्र खेलाडीहरूको साथमा रहेको पनि बताएका छन् । टिम उपविजेतामा चित्त बुझाउन बाध्य भएपनि विराट कोहली ‘मोस्ट कन्सिसटेन्ट प्लेयर’ बनेका छन् । प्रतियोगिताको सर्वाधिक रनकर्ता रहेका कोहलीले ११ खेलमा ७६५ रन बनाए । उनले यसक्रममा तीन शतक र ६ अर्धशतक प्रहार गरे ।
विराटपछि सबैभन्दा धेरै रन बनाउने खेलाडी भारतीय टिमकै कप्तान रोहित शर्माले ५९७ रन बनाए । यस्तै, भारतीय टिमकै बलर मोहम्मद सामी प्रतियोगितामा सबैभन्दा धेरै विकेट लिने खेलाडी बनेका छन् । सामीले सात खेल खेल्दा २४ विकेट लिए । सामीपछि दोस्रो स्थानमा रहेका अस्ट्रेलियाका एडम जाम्पाले २३ विकेट लिए ।
