१५ मंसिर,एजेन्सी ।
भारतले दक्षिण अफ्रिका भ्रमणका लागि क्रिकेट टिमको घोषणा गरेको छ । भारतीय क्रिकेट बोर्ड बीसीसीआईका मुख्य छनोटकर्ता अजीत अगरकरले बिहीबार तीन वटै ढाचाको सिरिजका लागि भारतीय क्रिकेट टिमको घोषणा गरेका हुन् । साउथ अफ्रिका भ्रमणमा भारतले तीन टी ट्वान्टी, तीन वान डे र दुई टेष्ट म्याचको सिरिज खेल्नेछ ।
भारतीय टिमको टी ट्वान्टीको कप्तानी सुर्यकुमार यादवले सम्हाल्नेछन् । वान डे क्रिकेटको कप्तानी केएल राहुलले पाउनेछन् भने टेस्ट टिमको कप्तानी रोहित शर्माले गर्नेछन् । रोहित शर्मा र विराट कोहलीले साउथ अफ्रिका भ्रमणमा टी ट्वान्टी र वान डे क्रिकेटमा बिश्राम मागेका थिए । मोहम्मद शामी चोटको उपचार गरिरहेका छन्, उनको उपस्थिती फिटनेशमा निर्भर रहने बताईएको छ ।
वान डे क्रिकेटमा सन्जु सामसन र युजवेन्द्र चहलले पुनरागमन गरेका छन् । रजतत पाटीदार, साइ सुर्दशनलाई समेत नयाँ अनुहारको रुपमा टिममा छनोट गरिएको छ । युजवेन्द्र चहल र सन्जु सामसनलाई ठूलो मौका मिलेको छ । किनकी वान डेमा शुभमन गिल र सुर्य कुमार यादवलाई राखिएको छैन । टेष्ट टिमबाट केएस भरतलाई बिदा गरिएको छ ।
अब टेष्ट टिममा विकेटकिपरको रुपमा केएल राहुल र इशान किशन हुनेछन् । टेष्ट टिमको उप कप्तानमा जसप्रीत बुमराह रहनेछन् । बुमहराले पछिल्लोपटक १७ महिनाअघि बर्मिङ्घममा इङ्ल्यान्डविरुद्ध टेस्ट क्रिकेट खेलेका थिए । उनी लामो समय पिठ्यूँको समस्याबाट पिडीत भएका थिए ।
उनले हालै घरेलु मैदानमा सम्पन्न आईसीसी एकदिवसीय विश्वकप भने खेलेका थिए । टी ट्वान्टीमा पुन एक पटक सुर्यकुमारलाई बोर्डले विश्वास गरेको छ । जसमा उपकप्तान रविन्द्र जडेजा हुनेछन् । जडेजालाई पहिलो पटक ठूलो जिम्मेवारी दिईएको छ । ऋतुराज गायकवाडलाई तीनै ढाचाको क्रिकेटमा राखिएको छ ।
भारतीय क्रिकेट टोलीको प्रमुख प्रशिक्षकका रुपमा दोस्रो पाली सुरु गरेयता राहुद द्रविडका लागि पनि यो पहिलो टेस्ट हुनेछ । बीसीसीआईले बुधबारमात्र प्रमुख प्रशिक्षक द्रविडको सम्झौता लम्ब्याउने निणर्य गरेको थियो । डिसेम्बर १० देखि सुरु हुने दक्षिण अफ्रिका भ्रमणका क्रममा भारतीय टोलीले टी—२० र एकदिवसीय अन्तर्राष्ट्रिय शृंखला पनि खेल्ने कार्यक्रम छ ।
