विराटनगर,भदौ २८
संघीय समाजवादी फोरम नेपालको प्रदेश १ स्तरीय भेला असोज ९ र १० गते विराटनगरमा हुने भएको छ । फोरमका १ नम्बर प्रदेश सहइन्चार्ज एवं केन्द्रीय सचिव परशुराम बस्नेतले बिहीबार विराटनगरमा पत्रकार सम्मेलन गरी पहिलोपटक प्रदेशको भेला गर्न लागिएको जानकारी दिएका हुन् ।
पहिचानसहितको संघीयता, समावेशी लोकतन्त्र, समानुपातिक समावेशीकरण, राष्ट्रिय पहिचानको मान्यता र अधिकारसहितको ११ प्रदेशको माग यथावत भए पनि पार्टीको संरचना भने अहिलेको राज्यको संरचनाअनुसार नै निर्माण गर्न लागिएको बस्नेतले बताए ।
राज्यको विशेष संरचनाको रुपमा स्वायत्त क्षेत्र, संरक्षित क्षेत्र र गैरभौगोलिक विशेष क्षेत्रलाई राजनीतिक संरचनाको रुपमा कायम राख्दै सात वटा प्रदेशको समिति गठन हुने पनि उनले बताए । प्रदेशको भेलाबाट तदर्थ समिति निर्माण हुनेछ ।
५ सय २५ जना प्रतिनिधिहरु सहभागी हुने भेला विराटनगरस्थित अतिथिसदनमा हुनेछ । संघीय समाजवादी फोरमको विधानमा ५१ जना निर्वाचित र १० प्रतिशत मनोनित गरी ५७ जनाको समिति रहने व्यवस्था छ ।
