३ असार, विराटनगर ।
नेपाली क्रिकेट टिमका लेग स्पिनर सन्दीप लामिछानेले टी–२० आई क्रिकेटमा १०० विकेट पूरा गरेका छन् ।
सन्दीपले बंगलादेशविरुद्ध २ विकेट लिँदै शतक विकेट पूरा गरेका हुन् । जारी विश्वकप सुरु हुदासम्म सन्दीपको विश्वकप खेल्ने संभावना सकिसकेको आकलन गरिएको थियो ।
दुई पटकसम्म प्रयास गर्दा समेत अमेरिकाले भिसा नदिएपछि सन्दीपले समेत विश्वकप खेल्ने आशा मारिसकेका थिए । तर जे हुनु थियो त्यो भएरै छाड्छ भनेझै सन्दीप नेपालले समूह चरणमा खेल्ने दुई खेलमा लागि वेस्टइन्डिज पुगे । जहाँ उनले दक्षिण अफ्रिका र बंगलादेशसँग विश्वकप क्रिकेट खेल्ने अवसर पाए ।
यसै क्रममा उनले टी २० अन्तराष्ट्रियमा आफ्नो सय विकेट पूरा गरेका छन् । योसँगै उनी टी–२० आई क्रिकेटमा छोटो एक सय विकेट पूरा गर्ने दोस्रो खेलाडी बनेका छन् । उनले ५४ टी–२० आई खेलमा १०० विकेट पूरा गरेका हुन् ।
छिटो १०० विकेट पूरा गर्ने खेलाडीको सुचीको पहिलो स्थानमा अफगानिस्तानका रसिद खानको नाममा छ । उनले ५३ खेलमा एक सय विकेट पूरा गरेका थिए ।
सन्दीप टी–२० आई क्रिकेटमा १०० विकेट विकेट पूरा गर्ने पहिलो नेपाली समेत बनेका छन् ।
उनले विश्वकपको १८ हजार दर्शक क्षमताको किङ्सटाउनस्थित आर्नोस भेल स्टेडियममा विश्वभरका क्रिकेट दर्शकलाई साक्षी राखेर नेपालका लागि जुन पहिलो कीर्तिमान बनाएका छन्, त्यो पहिलो सन्दीपको नाम अब इतिहासमा कसैले मेटाउन सक्ने छैनन् ।
उनले एकदिवसीय खेलमा पनि आफ्नो सय विकेट पूरा गर्दै कीर्तिमान बनाइसकेका छन् । उनले एकदिवसीयमा ११२ विकेट लिइसकेका छन् । उनले मात्र ४२ खेल खेल्दै एकदिवसीयमा सय विकेट पूरा गरेका हुन् ।
सर्वाधिक छिटो एकदिवसीयमा सय विकेट लिने खेलाडीको सूचीमा अझै पनि सन्दीप नै पहिलो स्थानमा छन् । यो सूचीमा ४४ खेलमा सय विकेट पूरा गरेका रसिद दोस्रो स्थानमा छन् ।
सन्दीपले टी २० मा भने २०६ विकेट लिइसकेका छन् । टी २० आईमा सबैभन्दा छिटो समय विकेट पूरा गर्नेमा अफगानिस्तानका बलर रसिद खान रहेका छन् । उनले मात्रै ५३ इनिङमा आफ्नो सय विकेट पूरा गरेका छन् ।
रासिदलाई सय विकेट पूरा गर्न ६ वर्ष ३ दिन लागेको थियो भने सन्दीपले ६ वर्ष १६ दिनमा यो उपलब्धि हासिल गरेका छन् ।
सन्दीपपछि यो सूचीमा श्रीलंकाका वानिन्दु हंसरंगा रहेका छन् । उनले ६३ खेल खेल्दै सय विकेट पूरा गरेका छन् ।
यस्तै पाकिस्तानका हरिस राउफले ७१ खेलमा सय विकेट पूरा गरेका छन् । यस्तै छिटो सय विकेट लिने सूचीको पाँचौ स्थानमा छन् आयरल्याण्डका मार्क एडेयर । उनले ७२ खेलमा सय विकेट पुरा गरेका छन् ।
