६ असार, एजेन्सी ।
साउदी अरबको चर्को गर्मीले यस वर्षको हजयात्रामा जाने हाजीहरूलाई ठूलो समस्या भएको छ ।
गर्मीसँग सम्बन्धित रोगका कारण साउदी अरबमा हालसम्म ९०० हाजीको मृत्यु भइसकेको अन्तराष्ट्रिय संचारमाध्यामहरुले उल्लेख गरेका छन् ।
मृत्यु हुनेहरुमा भारत, इजिप्ट, जोर्डन, इन्डोनेसिया, इरान, सेनेगल, ट्युनिसिया लगायत देशका नागरिकहरू छन् ।
भारतका मात्रै ९० जना नागरिकको मृत्यु भएको त्यहाँस्थित कूटनीतिक नियोगलाई उद्धृत गर्दै भारतीय सञ्चार माध्यमहरूले लेखेका छन् ।
हजका क्रममा बेपत्ता भएका तीर्थयात्रीका परिवारलाई खोजी गर्न निकै समस्या भइरहेको बताइएको छ । बेपत्ता हजयात्रीका आफन्तले अस्पतालमा आफ्ना प्रियजनको खोजी गरिरहेका छन् । तापक्रम ५१ दशमलव ८ डिग्री पुगेका कारण मक्कामा सबैभन्दा बढी मृत्यु भएको छ ।
यस वर्ष करिब १८ लाख मानिस हजमा सहभागी भएका थिए । साउदी नेशनल सेन्टर फर मेट्रोलोजीका अनुसार मक्का वरपरका तीर्थस्थलहरूले प्रचण्ड गर्मी र तातो मौसमको अनुभव गरिरहेका छन्।
५० को आसपासको तापक्रम विशेषगरी वृद्ध हाजीका लागि असहनीय बन्दै गएको छ भने गर्मीका कारण बेहोस हुने गरेका छन् ।
दर्ता नगरी आउने मानिस पनि हाजी हुनु र उचित आवास र उपचार नपाउनुको प्रमुख कारण रहेको भनिएको छ ।
हाजीहरूको ठूलो संख्यामा मृत्यु हुनुको मुख्य कारण बिना अनुमति आउने तीर्थयात्री, अराजकता र तीव्र गर्मी सहन वृद्धवृद्धाहरूको असक्षमता रहेको छ ।
अनुमति लिएका तीर्थयात्रीहरूलाई मात्र खुला प्रार्थना गरेपछि एसी टेन्टमा जान अनुमति दिइन्छ। त्यस्ता यात्रुहरू विशेष गरी रोगबाट पीडित छन् र आफ्नो ज्यान गुमाएका छन्।
हरेक वर्ष हजारौं तीर्थयात्रीहरूले अनियमित माध्यमबाट हज गर्न प्रयास गर्छन् किनभने उनीहरूले महँगो आधिकारिक अनुमतिहरू किन्न सक्दैनन्।
सन् २०१९ मा साउदी अरेबियाले सामान्य पर्यटक भिसा लागू गरेपछि यो सहज भएको छ। आधिकारिक अनुमति पाएका तीर्थयात्रीहरू बेपत्ता भएमा अधिकारीहरूले पनि पत्ता लगाउन नसक्दा समस्यामा परेका छन्।
शिविरमा सरसफाईको अभाव, अपर्याप्त खाना र मीनाको टेन्ट सिटीमा भीडभाड भएको गुनासोहरू सार्वजनिक भएका छन् ।
