५ साउन, विराटनगर।
विराटनगर महानगरपालिकाको फोहोर व्यवस्थापन गर्ने साझेदारी संस्था फुलबारीले आफ्ना सदस्यहरुलाई विभिन्न किसिमका फलका विरुवाहरु उपहार दिने भएको छ । विराटनगर महानगरपालिकाको उत्तरी भेगको सरसफाइ र व्यवस्थापन गरिरहेको नेपाल फुलबारी वेस्ट थ्री आर पलुसन कन्ट्रोल सर्भिस प्राइभेट लिमिटेडले’ १ सदस्यलाई १ विरुवा ’ उपहार प्रदान गर्ने जनाएको छ ।
सो उपहारस्वरुपको विरुवा फुलबारीका सदस्यले आफ्नो घरको पायक पर्ने स्थानमा रोप्नु पर्ने फुलबारीका प्रमुख व्यवस्थापक उमेश कटुवालले बताए । कतिपय सदस्यहरुको विरुवा रोप्ने स्थान नभएको खण्डमा भने उनीहरुकै अनुमतिमा पायक पर्ने सार्वजनिक स्थानमा रोपिने र त्यसको संरक्षण समेत गरिने कटुवालले जानकारी दिए ।
विराटनगर महानगरपालिकाको १,२,३,४,५, र १९ न वडा गरि जम्मा ७ हजार सदस्यहरु रहेको फुलबारीको यस अभियानको सफलता पश्चात विराटनगरमा थप ७ हजार जति फलका विरुवाहरु हुर्किने विश्वास राखिएको छ । उपहार दिइने विरुवाहरुमा कम समयमा फल दिने किसिमको माल्दह तथा अम्रपाली आँप, लिचि, अमला, रातो अम्बा, रेड लेडि मेवा, बयर, सरिफा, आलुबखडा, नास्पति, चेरी, जामुन, सुपारी, अनार, बडर लगायतका फलहरु रहेका छन् ।
विराटनगर महानगरपालिका, सामाजिक संस्था अचेत समूहलगायत विभिन्न वातावरण अभियान्ताहरुको सहकार्यमा आईतबारबाट शुरु गरिने यस अभियानले विराटनगरको वातावरण संरक्षणमा टेवा पुर्याउने अपेक्षा गरिएको छ । सरसफाइ र फोहोर व्यवस्थापन गरिरहेको फुलबारीको यस अभियानले विराटनगरलाई हरियाली शहर बनाउने सपना साकार बनाउन भुमिका खेल्नुका साथै आफ्ना सदस्य र संस्थाबीचको जिम्मेवारीलाई थप सशक्त पनि बनाउने फुलबारीका प्रमुख व्यवस्थापक उमेश कटुवालले बताए ।
