१२ साउन , एजेन्सी ।
एसीसी एशिया कप महिला क्रिकेटमा भारतलाई परास्त पार्दै उपाधि घर लैजाने पाकिस्तानको सपना चकनाचुर भएको छ । गएराती श्रीलंकासंग पराजित भएसंगै पाकिस्तान सेमिफाइनलमै रोकिएको हो । यता आयोजक श्रीलङ्का भने फाइनलमा पुगेको छ । हिजो भएको दोस्रो सेमिफाइनल खेलमा पाकिस्तानलाई तीन विकेटले हराउँदै घरेलु टोली उपाधि नजिकै पुगेको हो ।
पाकिस्तानले दिएको एक सय ४१ रनको लक्ष्य श्रीलङ्काले १९ ओभर ५ बलमा ७ विकेट गुमाएर भेट्टायो । उसका कप्तान चमारी अथापथ्थुले सर्वाधिक ६३ रन बनाइन । उनले ४८ बलमा ९ चौका र २ छक्काको सहयोगमा ६३ रन बनाएकी हुन् । अनुष्का सन्जिवनीले २२ बलमा २४ रन जोडिन् । पाकिस्तानका लागि सादीया इकवालले ४ ओभरमा १६ रन खर्चिएर ४ विकेट लिइन् ।
त्यसअघि टस हारेर पहिले ब्याटिङ गरेको पाकिस्तानले २० ओभरमा ४ विकेटको क्षतिमा १ सय ४० रन बनाएको थियो । पाकिस्तानका लागि ओपनर मुनिबा अलिले ३४ बलमा सर्वाधिक ३७ रन बनाउँदा अर्का ओपनर गुल फिरोजाले २४ बलमा २५ रन थपिन् । कप्तान निदा दार र फतिमा सानाले समान २३ रन बनाउँदा अलिया रियाजले १५ बलमा अविजित १६ रन बनाइन् ।
श्रीलंकाका कविशा दिलहरी र उडिशिका प्रबोधानीले समान २ विकेट लिए । अब श्रीलंकाले आइतबार भारतसँग एसिया कपको उपाधिका लागि खेल्नेछ । साविक विजेता भारतले हिजै भएको पहिलो सेमिफाइनलमा बंगलादेशमाथि १० विकेटको जितका साथ फाइनलमा स्थान पक्का गरेको थियो । भारत ८ मध्ये ७ संस्करण को च्याम्पियन हो । सन् २०१८ मा बंगलादेशले उपाधि जितेको थियो ।
