७ भदौ, विराटनगर ।
अर्जेन्टिनी मिडफिल्डर एन्जल डी मारियाले विश्व फुटबलका दुई हस्ती क्रिस्टियानो रोनाल्डो र लियोनल मेसीसँग खेल अनुभव संगालिसकेका छन् । पोर्चुगलका स्ट्राइकर रोनाल्डोसँग क्लब फुटबल अनि मेसीसँग क्लब र देश गरी दुवैतर्फको अनुभव छ, डी मारियासँग ।
हाल पोर्चुगिज क्लब बेन्फिकाबाट व्यावसायिक फुटबल खेलिरहेका डी मारियाले अन्तर्राष्ट्रिय खेलबाट भने सन्न्यास घोषणा गरिसकेका छन् । सन् २०२२ मा विश्वकप जित्दा पनि डी मारिया र मेसी एकसाथ अर्जेन्टिनी टोलीमा थिए । त्यसभन्दा अघि डी मारियाले फ्रेन्च क्लब पेरिस सेन्ट जर्मेन (पिएसजी) मा मेसीसँग एकसाथ खेलेका थिए ।
रोनाल्डोसँग भने उनले स्पेनिस क्लब रियल मड्रिडबाट एकसाथ खेलेका थिए । सन् २०१४ मा रियलले च्याम्पियन्स लिगको उपाधि जित्दा एकसाथ उत्सव मनाएका थिए, रोनाल्डो र डी मारियाले । रोनाल्डोसँग चार वर्ष रियलमा बिताएका डी मारियाले पिएसजी र रियलबाहेक युभेन्टस र म्यानचेस्टर युनाइटेडबाट पनि खेले ।
अहिले क्लब फुटबलको सुरुआत गर्दाताकाको क्लब बेन्फिका फर्किएका ३६ वर्षीय डी मारियालाई हालै एक अन्तर्वार्तामा मेसी र रोनाल्डोमध्ये को उत्कृष्ट भन्ने प्रश्न सोधिएको थियो । जसमा उनले सर्वाधिक धेरै आठ पटकका बालोन डी‘ओर विजेता मेसी नै सर्वोत्कृष्ट खेलाडी भएको बताएका छन् ।
उनले फ्रान्स फुबटलसँगको कुराकानीमा भनेका छन्, ‘मैले भन्नै पर्ने हुन्छ, जसले धेरै वर्ष खेलाडी बन्दै सर्वाधिक प्रतिष्ठित अवार्ड जितेका छन् । मेरो लागि मेसी नै उत्कृष्ट हुन् । उत्कृष्टताको सूचीमा मेसी र रोनाल्डोबीच सानोमात्र अन्तर छ ।’
३९ वर्षीय रोनाल्डो पाँच पटक बालोन डी‘ओरबाट पुरस्कृत भएका छन् । एक समय मेसी बार्सिलोना र रानाल्डोले रियलबाट खेल्दा उनीहरूबीच को उत्कृष्ट भन्ने सवाल–जबाफ सर्वत्र हुन्थ्यो । तर, अहिले दुवै जना युरोपियन लिगभन्दा अलग भएर खेलिरहेका छन् ।
बार्सिलोना छोडेर मेसी पिएसजी हुँदै अमेरिकन क्लब इन्टर मियामी पुगेका छन् भने रोनाल्डोले रियल छोडेपछि युभेन्टस, म्यानचेस्टर युनाइटेड हुँदै साउदी अरेबियन क्लब अल नासरबाट खेलिरहेका छन् । मेसी र रोनाल्डो दुवै खेलाडीको सहयोगमा आफ्नो खेलमा सुधार आएकोमा खुसी छन्, डी मारिया । पछिल्ला केही वर्ष उनीहरूसँग फुटबल खेल्दा आफूमा धेरै नै परिवर्तन आएको उनको भनाइ छ ।
उनले भनेका छन्, ‘विश्वभरि रोनाल्डो र मेसीमा को उत्कृष्ट छ भनेर निरन्तर चर्चा हुँदै आइरहेको छ । जबकि, उनीहरू अमेरिका र साउदी अरबमा छन् । ला लिगामा उनीहरू हुँदासम्म लिग नै उत्कृष्ट बनेको थियो । फुटबलप्रति सबैको माया बढाउने काम नै उनीहरूले गरेका थिए । त्यसमा एउटा चासोको विषय के हो भने, अहिले अमेरिकीहरूले पनि फुटबलको पुनर्खोज सुरु गरिसकेका छन् ।’
मेसी र रोनाल्डोबीच को उत्कृष्ट भन्ने सवाल करिब–करिब डेढ दशक अघिदेखि नै फुटबल समर्थकहरू उठाउँदै आएका छन् । मैदानभित्र घनघोर प्रतिस्पर्धा रहने मेसी र रोनाल्डोबीच मैदानबाहिर पनि उत्तिकै प्रतिस्पर्धा हुन्थ्यो । विशेषगरी उनीहरूले पुरस्कारमा, उनीहरूले बनाउने कीर्तिमानमा, राष्ट्रिय टोलीका लागि गरेको योगदानमा र सामाजिक सञ्जालमा उस्तै प्रतिस्पर्धा रहन्थ्यो ।
अरूमा उत्तिकै प्रतिस्पर्धा रहँदा सन् २०२१ सम्म राष्ट्रिय टोलीका लागि गरेको योगदानमा मेस्सी निरिह थिए । किनकि, सन् २०१६ मा नै रोनाल्डोले पोर्चुगललाई नेसन्स लिग जिताएका थिए । तर, २०२१ मा कोपा अमेरिका र २०२२ को विश्वकप जितेपछि राष्ट्रका लागि योगदान दिने मामलामा रोनाल्डो पछाडि परे ।
रोनाल्डो फुटबल इतिहासमा सर्वाधिक धेरै गोल गर्ने खेलाडी पनि हुन् । उनले पोर्चुगलका लागि २१२ खेल खेलेर १३० गोल गरेका छन् भने क्लबतिर एक हजार १६ खेल खेलेर ७६२ गोल गरेका छन् । मेस्सीले भने अर्जेन्टिनाका लागि १८७ खेल खेल्दा १०९ गोल गरेका छन् भने क्लबतर्फ ९०४ खेल खेलेर ७३५ गोल गरेका छन् ।
