१९ भदौ , विराटनगर।
रुसी राष्ट्रपति भ्लादिमिर पुटिनले आफू कति शक्तिशाली छन् भन्ने पुनः एकपटक विश्वलाई देखाइदिएका छन् । चीन, उत्तर कोरिया, इरानजस्ता पश्चिमा खासगरी अमेरिकाको कट्टर विपक्षीका रुपमा उभिएका देशमा मात्रै होइन इन्टरनेसनल क्रिमिनल कोर्टको सदस्य राष्ट्र मंगोलियामा समेत भव्य भ्रमण गरेर शक्तिराष्ट्रलाई गतिलो झापड हानेका छन् ।
जबकी मंगोलियाका अधिकारीहरुलाई आईसीसीले आफ्नो आदेश मान्दै पुटिनलाई पक्राउ गर्न भनेको थियो । त्यसको उल्टो पुटिनले मंगोलियामा भव्य स्वागत पाए । आफूविरुद्ध पक्राउ पुर्जी जारी भएपछि कुनै पनि आईसीसी सदस्य राष्ट्रको पुटिनले भ्रमण गरेको यो पहिलो अवसर हो ।
युक्रेनका बालबालिकाहरूलाई गैरकानुनीरूपमा डिपोर्ट गरेको आरोपमा आईसीसीले उनीविरुद्ध पक्राउ पुर्जी जारी गरेको छ । भ्रमणअघि युक्रेनले पनि पुटिनलाई पक्राउ गर्न भनेको थियो । यता क्रेमलिनका प्रवक्ताले भ्रमणका दौरान पुटिन पक्राउ पर्ने कुनै चिन्ता नरहेको स्पष्ट पारेका थिए ।
यसबीच मंगलबार राजधानी उलानबाटारमा मंगोलियाका नेताले भव्य समारोहबिच पुटिनलाई स्वागत गरे । जंगेज खाँ स्क्वेरमा उक्त कार्यक्रम आयोजना गरिएको थियो । समारोहपछि पुटिनले मंगोलियाका राष्ट्रपति उखनागलिन खुरेलसुखसँग भेटवार्ता गरे । मंगोलियामा भएको पुटिनको स्वागत किभ, अमेरिका र उसंग जोडिएको समूहका विरुद्धका रुपमा हेरिएको छ ।
युक्रेनले पुटिनको यो यात्रामा रोष प्रकट गरेको छ । जेलेन्स्कीले मंगोलियामाथि पुटनको युद्ध अपराधलाई लुकाएको आरोप लगाएका छन् । मंगोलिया रुस र चीनबीच कम जनसंख्या भएको एक देश हो । र यो देश इन्धन र विजुलीका लागि रुसमाथि र आफ्नो खनिज उद्योगमा लगानीका लागि चीनमा निकै नै आश्रित छ ।
युक्रेनमा गरेको आक्रमणलाई लिएर अन्तर्राष्ट्रिय स्तरमा आफूमाथि प्रतिबन्ध लगाउने कयौं प्रयासहरुको सामना गर्नका लागि पुटिनले हालैको महिनाहरुमा कयौं देशहरुको भ्रमण गरेका छन् । उनले मेमा चीन र जुनमा उत्तर कोरिया साथै भियतनामको यात्रा गरेका थिए । जुलाईमा उनी शांघाई सहयोग संगठन(एससीओ) को बैठकमा भाग लिनका लागि कजाखस्तान गएका थिए ।
गत वर्ष दक्षिण अफ्रिकी सरकारले पुटिनको जोहानसबर्गमा ब्रिक्स शिखर सम्मेलनमा सहभागि हुनेमा आपत्ति जनाएपपछि पुटिनले सो बेला भिडियो कन्फ्रेन्सबाट बैठकमा भाग लिएका थिए । दक्षिण अफ्रिका पनि आईसीसीको सदस्य हो । यसबीच पुटिनले तत्कालिन इरानी राष्ट्रपति राइसीलाई मस्कोमा स्वागत गरेका थिए भने आफू पनि इरान पुगेका थिए । यस्तै चिनियाँ राष्ट्रपति, भारतीय प्रधानमन्त्री, उत्तर कोरियाका सर्वोच्च नेतालाई पनि मस्कोमा स्वागत गरेका थिए ।
पश्चिमाहरुको प्रतिबन्धका बीच पूर्वका परमाणु शक्तिसम्पन्न शक्तिराष्ट्रहरुसंगको सम्बन्ध सुधार गर्दै भ्रमण जारी राखेका पुटिन यसैको निरन्तरता स्वरुप मंगोलिया पुगेका हुन् । उनी मंगोलिया पुगेका बेला यता युक्रेनलाई भने दशा आइलागेको छ । रुसले यो वर्षकै सबैभन्दा घातक हमला गरेको छ । रुसी मिसाइल आक्रमणमा परि ४९ युक्रेनीको मृत्यु भएको छ भने २१९ जना घाइते भएका छन् ।
युक्रेनको मध्यपूर्वी क्षेत्रमा एक सैन्य तालिम केन्द्र र नजिकैको अस्पतालमा दुई वटा रुसी ब्यालेस्टिक क्षेप्यास्त्र प्रहार भएको युक्रेनका राष्ट्रपति भोलोदिमर जेलेन्स्कीले बताएका छन् । अधिकारीहरूले आक्रमण पोल्टावा शहरमा भएको बताए । पोल्टावा किभबाट करिब ३५० किलोमिटर दक्षिणपूर्वमा रहेको छ । रुसको सीमा नजिकै रहेको यो शहर किभ र युक्रेनको दोस्रो सबैभन्दा ठूलो शहर खार्किभ बीचको मुख्य राजमार्ग र रेलमार्गमा छ ।
नौ सय दिनभन्दा पनि धेरैअघि सन् २०२२ फेब्रुअरी २४ मा युद्ध सुरु भएपछि यो आक्रमण रुसी सेनाले गरेको सबैभन्दा घातक आक्रमण भएको अन्तर्राष्ट्रिय मिडियाले उल्लेख गरेका छन् । धेरै मानिस बम आश्रय स्थलतर्फ जाँदै गर्दा हवाई आक्रमणको चेतावनी जारी भएलगत्तै क्षेप्यास्त्रहरू प्रहार भएका थिए । युक्रेनको रक्षा मन्त्रालयले आक्रमणलाई ‘बर्बरतापूर्ण’ भनेको छ ।
उद्धार टोली र चिकित्सकहरूले २५ जनालाई बचाएको रक्षा मन्त्रालयले विज्ञप्तिमा बताएको छ । तीमध्ये ११ जनालाई भग्नावशेषबाट बाहिर निकालिएको थियो । पोल्टावाका गभर्नर फिलिप प्रोनिनले बुधबारदेखि तीन दिने शोकको घोषणा गरेका छन् । यो आक्रमणपछि युक्रेनी राष्ट्रपतिले पश्चिमी साझेदारहरूसँग सैन्य सहायताको तत्काल डेलिभरी सुनिश्चित गर्नका लागि आफ्नो अपिललाई दोहो¥याएका छन् । यसअघि उनले अमेरिका र युरोपेली मुलुकहरूसँग सहयोगको आफ्नो वाचाहरू पूरा गर्न ढिलो भएको भन्दै आलोचना गरेका थिए ।
जेलेन्स्कीलाई रुसी मिसाइल र आफ्ना मन्त्री तथा अधिकारीका तर्फबाट एकैसाथ झट्का लागेको छ । उनको क्याबिनेटका मन्त्रीसहित ६ यूक्रेनी अधिकारीहरुले मंगलवार आफ्नो पदबाट राजीनामा दिएका छन् । जेलेन्स्कीले पनि आफ्ना एक सहयोगीलाई बर्खास्त गरेका छन् । जेलेंस्कीको पार्टीका वरिष्ठ नेता डेविड अराखामियाले यो साता सरकार पुनर्गठन हुने पनि बताएका छन् ।
जेलेन्स्कीलाई मन्त्रीहरुले यस्तो बेला साथ छोडेका छन्, जतिबेला रुसले शक्तिशाली दुई ब्यालेस्टिक मिसाइल हानेको छ । उनलाई विदेशमन्त्री समेतले साथ छाडे । विदेशमन्त्री दमित्रो कुलेबाले आज नै राजीनामा बुझाएका हुन् । कुलेबा जेलेनेस्कीको मन्त्रिमण्डलका अर्को हाई–प्रोफाइल मन्त्री हुन् । यसबारे आफ्ना टिप्पणी अवस्य व्यक्त गर्नुहोला ।
ताजा खबरका लागि नेपाल टाइम्स्को अनलाइन पोर्टल डब्लु डब्लु डब्लु डट नेपाल टाइम्स् डट नेटमा गएर हेर्न सक्नु हुनेछ । यसैगरि हाम्रो युट्युव च्यानल र फेसबुक पेज पनि अवस्य भिजिट गर्नुहोला । तपाईले गर्नु भएको लाइक, कमेन्ट, सेयर र सब्क्राइबका लागि धेरै धन्यवाद । नेपाल टाइम्स् हेर्दै गर्नुहोला नमस्कार ।
