२१ भदौ, विराटनगर ।
भारतमा यसै सेप्टेम्बर महिनामा हुने तेस्रो संस्करणको लिजेन्ड्स लिग क्रिकेट टी–२० प्रतियोगिताको खेल तालिका सार्वजनिक भएको छ । उक्त तालिकाअनुसार नेपालका पारस खड्का आबद्ध गुजरात टिमले २२ सेप्टेम्बरमा मणिपाल टाइगर्ससँग खेल्ने छ ।
साविक विजेतासमेत रहेको मणिपाल हरभजन सिंहको टोली हो । उसले गत सिजन हैदराबालाई पाँच विकेटले हराउँदै उपाधि जितेको थियो । त्यसअघि सन् २०२२ मा भएको पहिलो संस्करणको उपाधि भने इन्डिया क्यापिटल्सले जितेको थियो ।
क्रिकेट संघ (क्यान) का सचिव एवम् राष्ट्रिय टोलीका पूर्वकप्तानलाई गुजरातले यो सिजनका लागि अनुबन्ध गरेको थियो । प्रतियोगिताको तेस्रो संस्करणमा उनलाई गुजरातले साढे १२ लाख भारु अर्थात् २० लाख नेपाली रुपैयामा अनुबन्ध गरेको हो ।
तेस्रो संस्करणको पहिलो खेल जोधरपुरस्थित बकरतुल्लाह खान स्टेडियममा सेप्टेम्बर २० मा सुरु हुनेछ । उद्घाटन खेलमामा मणिपाल र इरफान पठानको टोली कोर्णाक ओडिशाले खेल्ने छन् ।
सन्यास लिएका खेलाडीहरूले खेल्ने यो लिगमा ६ टोलीको सहभागी हुनेछन् । ६ वटा टोलीलाई दुई समूहमा विभाजन गरिएको छ । पहिलो समूहमा इन्डिया क्यापिटल्स, कोर्णाक ओडिशा र मणिपाल टाइगर्स छन् भने अर्को समूहमा गुजरात, हैदराबाद र साउथर्न सुपरस्टार्स रहेका छन् ।
प्रतियोगिता भारतको जोधपुर, जम्मु र सुरतमा खेलाइने छ । प्रतियोगिताको फाइनल खेल भने अक्टोबर १६ मा हुनेछ ।
