८ कार्तिक ,एजेन्सी ।
जतिबेला विश्व चर्चित फुटबलर लियोनल मेसी युरोपियन लिगमा सक्रिय भएर लागिपरेका थिए, त्यसबेला डेभिड बेकह्यामले उनलाई आफ्नो क्लब इन्टर मियामीमा भित्र्याउने सपना बुनेका थिए ।
सन् २०१४ मा फुटबल करिअर समाप्त गरेका बेकह्याम मियामीमा व्यवस्थापकीय रूपमा प्रवेश गरेका थिए ।अमेरिकामा फुटबलको क्रेज बढाउन चर्चित खेलाडीको आवश्यकता पर्ने उनलाई राम्रोसँग थाहा थियो ।
बेकह्यामले सुरुदेखि नै मेसी र क्रिस्टियानो रोनाल्डोलाई एकैसाथ अनुबन्ध गर्न योजना बनाएका थिए ।बेकह्यामको योजना मेसीलाई मेजर सकर लिगमा भित्र्याउँदै अमेरिकामा फुटबलको क्रेज विस्तार गर्ने थियो ।
मेसी भने स्पेनिस क्लब बार्सिलोनामा रमाइरहेका थिए । बार्सिलोनापछि उनी फ्रान्सेली क्लब पिएसजी हानिए । आफ्ना पूर्वसहकर्मी नेयमार जुनियर र विश्वकप विजेता किलियन एम्बाप्पेका साथमा फ्रेन्च लिग खेलिरहेका मेसीले युरोपबाहिरको क्लबबाट खेल्छन् भन्ने कसैले सोचेका पनि थिएनन् ।
पिएसजीबाट खेलिरहँदा उनलाई साउदी अरेबियन प्रो लिगअन्तर्गत अल हिलालले विश्व कीर्तिमान रकम प्रस्ताव नपठाएको होइन । साउदी क्लबमा जाँदा मेसी यति मालामाल हुन्थे कि उनलाई सर्वाधिक कमाइ गर्ने खेलाडीमा कसैले पनि भेट्टाउन सक्दैनथे ।
तर, मेसी करोडौँ मिलियन डलरको पछि लागेनन् । उनले आँखा चिम्लिँदै मियामीसँग सम्बन्ध गाँसे । मेसी भित्र्याउने बेकह्यामको घोषणाप्रति खिल्ली उडाउने आलोचकहरू धेरै थिए । तर, मेसीलाई मियामीमा ल्याउने सपना बेकह्यामले दुई वर्षअघि पूरा गरे ।
जुन बेला मियामी आउने स्वयम् मेसीले घोषणा गरेका थिए, सबैभन्दा धेरै खुसी बेकह्याम नै भए । बेकह्यामले जीवनकै महत्वपूर्ण सपनामध्ये एक पूरा हुँदा निःशब्द नै भएको बताएका थिए ।
मेसी मियामीमा आउनुअघि नै रोनाल्डो साउदीकै अल नासरमा पुगेका कारण, बेकह्यामको सपना पूरा हुन पाएको थिएन । तर, मेसी अनुबन्ध गरेपछि बेकह्याम गद्गद् भएका थिए, मेसीको आगमनपछि मेजर सकर लिगको माहोल नै परिवर्तन भएको छ ।
कुनै समय खाली रंगशालामा मेसीको एक नजर र खेल हेर्न दर्शकको उपस्थिति अस्वाभाविक रूपमा भरिभराउ हुँदै गएका छन् । यो केवल मेसीकै कारण सम्भव भएको बेकह्याम मान्छन् ।
उपाधिविहीन मियामीलाई मेसीले आफ्नो पहिलो सिजनमै सफलता दिलाए । यस वर्ष मियामी लिग जित्ने अभियानमा अग्रसर देखिएको छ । मेजर सकर लिगको इतिहासमा कुनै पनि टोलीले बटुल्न नसकेको अंक मियामीले हात पारेको छ ।
लिगमा अझै खेल बाँकी छन् । मियामी सर्वाधिक ७४ अंकका साथ शीर्ष स्थानमा छ । यस्तै, किसिमको प्रदर्शन मियामीले जारी राख्दा अन्य टोलीले भेटाउन मुस्किल पर्छ । मियामीको यो सफलतामा लुइस सुआरेज, सर्जियो वुस्केट तथा जोडी अल्वाको भूमिको त्यत्तिकै छ ।
यी सबै खेलाडीसँग मेसीले बार्सिलोनामा रहँदा सहकार्य गरेका थिए । यसमाथि बार्सिलोनाका पूर्वप्रशिक्षक मार्टिनोले नै मियामीलाई प्रशिक्षण दिइरहेका छन् । मेसी सबै उमेरसँग फिट भएको प्रशिक्षक मार्टिनो मान्छन् ।
मियामीमा युवा पुस्ताका खेलाडीहरू २१ वर्षीय डिएगो गोमेज र १९ वर्षीय स्थानीय बेन्जामिन क्रेमाचीले मेसीलाई मैदानमा साथ दिइरहेका छन् । सुआरेज, बुस्केट र अल्वासँग पनि युवा खेलाडी त्यतिकै सक्रिय छन् ।
मेसीको आगमनसँगै मियामीले दुई उपाधि जितेको छ । बार्सिलोनाको जुनियर क्लबदेखि नै स्पेन बसेका उनले क्याटलान क्लबका लागि सबै प्रतियोगिता मिलाएर ७७८ खेल खेल्दा ६७२ गोल गरेका छन्, जुन क्लबको इतिहासमा सर्वाधिक हो ।
उनले बार्सिलोनामा रहँदा ३०३ गोलमा पास मिलाएका छन्, यो पनि क्लबको रेकर्ड हो ।मेसीले बार्सिलोनाबाट १० ला लिगा उपाधि जिते भने चार पटक च्याम्पियन्स लिग जिते । स्पेनमै रहँदा मेसीले ६ पटक बालोन डि’ओर जितेका थिए भने ६ पटक युरोपियन गोल्डेन ‘शु’ जिते ।
त्यसपछि उनले आफ्नो नाममा थप २ बालोन डि’ओर थप गरे । सन् २०११–१२ को सिजन ५० गोल गरेर उनी एकै सिजनमा सर्वाधिक गोल गर्ने खेलाडीसमेत बनेका थिए । सन् २०१२ मै एक क्यालेन्डर वर्षमा ९१ गोल गरेर उनी सर्वाधिक गोलकर्ता बने ।
मेसीको नेतृत्वमा बार्सिलोना विश्वकै सर्वश्रेष्ठ क्लबहरूमध्ये एक बनेको थियो भने उनको खेल शैलीले बार्साको ‘टिकि–टाका’ फुटबल प्रणालीलाई परिभाषित गर्न मद्दत गरेको थियो ।
बार्सिलोनापछि पिएसजी रोजेका मेसीले त्यहाँबाट ७५ खेलमा ३२ गोल गरे । पिएसजीलाई दुई पटक फ्रेन्च च्याम्पियन बनाउन उनको भूमिका रह्यो ।
