९ मंसिर ,एजेन्सी ।
पेप ग्वार्डिओलाको टोली म्यानचेस्टर सिटीले इंग्लिस प्रिमियर लिगमा लगातार चौथो हार व्यहोरेको छ । सिटीले शनिबार राति भएको खेलमा घरेलु मैदान इत्तिहाद रंगशालामै टोटनहमविरुद्ध ४–० को फराकिलो हार व्यहोरेको हो ।
टोटनहमको जितमा जेम्स म्याडिसनले दुई गोल गरे । पेड्रो पोरो र ब्रनान जोन्सनले समान एक गोल थपे । खेलको १३औँ मिनेटमा म्याडिसनले गरेको गोलमा टोटनहमले अग्रता बनाएको थियो । २०औँ मिनेटमा म्याडिसनले नै गोल गरेपछि टोटनहमले पहिलो हाफमा २–० को अग्रता बनाएको थियो ।
५२औँ मिनेटमा पोरोको गोलमा टोटनहमले अग्रतालाई ३–० मा पु¥यायो । यस्तै, इन्जुरी समयमा जोन्सनले गोल थपेपछि टोटनहमले ४–० को जित पक्का गरेको हो । सिटीको यो हारको शृंखला प्रशिक्षक पेप ग्वार्डिओलाको प्रशिक्षण करियरकै सबैभन्दा खराब लय हो ।
ग्वार्डिओलाको प्रशिक्षणमा सिटीले प्रिमियर लिगका खेलमा लगातार तेस्रो हार बेहोरेको पनि यो पहिलोपटक हो । उनको प्रशिक्षण करियरमा यसअघि कुनै पनि टिमले घरेलु मैदानमै चार गोलको हार व्यहोरेका थिएनन् ।
प्रिमियर लिगमा लगातार तेस्रो हार व्यहोरेको सिटी तालिकामा भने दोस्रो स्थानमा छ । सिटीले १२ खेलबाट २३ अंक जोडेको छ । जुन शीर्ष स्थानको लिभरपुलभन्दा पाँच अंक कम हो । लिभरपुलले ११ खेलबाट २८ अंक जोडेको छ ।
१२ खेलबाट १९ अंक जोडेको टोटनहम भने तालिकाको छैटौँ स्थानमा छ । प्रिमियर लिगमा शनिबारै भएका अन्य खेलमा आर्सनलले नटिंघम फरेस्टविरुद्ध ३–० को र चेल्सीले लेस्टर सिटीविरुद्ध २–१ को जित निकालेको छ ।
यता स्पेनिस ला लिगामा लिग लिडर बार्सिलोना बराबरीमा रोकिएको छ । शनिबार राति भएको खेलमा बार्सिलोना सेल्टा भिगोसँग उसैको मैदानमा २–२ को बराबरीमा रोकिएको हो । खेलको निर्धारित समय सकिन ६ मिनेट बाँकी रहँदासम्म बार्सिलोनाले २–० को अग्रता बनाएको थियो ।
तर, अन्तिम ६ मिनेटमा दुई गोल फर्काउँदै सेल्टा भिगोले हेन्सी फ्लिकको टिमबाट एक अंक खोस्न सफल बनेको हो । खेलको १५औँ मिनेटमा राफिन्हाको गोलमा बार्सिलोनाले अग्रता बनाएको थियो । ६१औँ मिनेटमा रोबर्ट लेवान्डोवस्कीले पाहुना टिमको अग्रता दोब्बर बनाए ।
खेलको ८२औँ मिनेटमा मार्क कासाडोले रातो कार्डको दर्शन गर्दै मैदान छोडेपछि बार्सिलोना १० खेलाडीमा समेटिएको थियो । त्यसको दुई मिनेटपछि नै सेल्टा भिगोले पहिलो गोल फर्कायो । घरेलु टिमका अल्फोन्सो गोन्जालेजले गोल गर्दै बार्सिलोनाको अग्रतालाई २–१ मा झारेका थिए ।
८६औँ मिनेटमा ह्युगो अल्भारेजको गोलमा सेल्टा भिगो खेलमा फर्कियो । बराबरीमा रोकिए पनि एक अंक जोडेको बार्सिलोना शीर्ष स्थानमा कायमै छ । बार्सिलोनाले १४ खेलबाट ३४ अंक जोडेको छ ।
समान खेलबाट १८ अंक जोडेको सेल्टा भिगो तालिकाको ११औँ स्थानमा छ । शनिबार राति नै भएको अर्को खेलमा एट्लेटिको मड्रिड जितसहित तालिकाको दोस्रो स्थानमा उक्लिएको छ । घरेलु मैदानमा भएको खेलमा एट्लेटिकोले डिर्पोटिभो अलाभेसविरुद्ध २–१ को जित निकालेको हो ।
खेलको पहिलो हाफमा जोन गुरिडीको गोलमा डिर्पोटिभो अलाभेसले अग्रता बनाएको थियो । तर, दोस्रो हाफमा एन्टोइन ग्रिजमन र एलेसान्डर सोर्लोथले गोल गर्दै घरेलु टिमलाई जितसहित तीन अंक दिलाएका हुन् ।
जितसँगै १४ खेलबाट २९ अंक जोडेको एट्लेटिको तालिकाको दोस्रो स्थानमा उक्लिएको छ । एट्लेटिकोलाई पछ्याइरहेको रियाल मड्रिडको २७ अंक छ । तर, रियालले दुई खेल कम खेलेको छ ।
१४ खेलबाट १३ अंक जोडेको डिर्पोटिभो अलाभेस तालिकाको १६औँ स्थानमा छ ।
