२० असार, काठमाडौं ।
एप्पलको बहुप्रतिक्षित आइफोन १७ सिरिज अबको २ महिनामा लन्च हुने भएको छ । लन्च हुनुभन्दा धेरै अगाडि नै यसले ठूलो उत्साह सिर्जना गरिरहेको अन्तराष्ट्रिय संचारमाध्यामहरुले उल्लेख गरेका छन् ।
सन् २०२५ को सेप्टेम्बरमा आइफोन १७ आउने बताइएको छ । क्यालिफोर्नियामा मुख्यालय रहेको एप्पलले ल्याउन लागेको आइफोन १७ सिरिजका चारवटा मोडलहरू अनावरण गर्ने सम्भावना रहेको समाचारमा उल्लेख छ ।
एप्पलको सिरिजअन्तर्गत आइफोन १७ प्रो म्याक्स, आइफोन १७ प्रो, आइफोन १७ एयर र स्ट्यान्डर्ड आइफोन १७ छन् । आइफोन १७ विभिन्न सिरिजमा डिस्प्ले अपग्रेड, ब्याट्री क्षमता, क्यामेरा सुधार, डिजाइन परिवर्तन, अनुमानित मूल्य तथा रिलिज तालिकासहितका विषयमा विभिन्न जानकारी बाहिर आएका छन् ।
एप्पलले आइफोन १७ का विभिन्न सिरिजहरू सन् २०२५ को मध्य–सेप्टेम्बरमा अनावरण गर्ने सम्भावना रहेको उल्लेख छ । यद्यपि, कम्पनीले औपचारिकरूपमा लन्च मिति घोषणा गरेको छैन ।
प्राविधिविज्ञ डेभिड फेलानले यसको अनावरण सम्भवतः सेप्टेम्बर ९ मा हुने बताएको फाइनान्सियल टाइम्सले जनाएको छ । एप्पलले सन् २०२५ मा आधारभूत आइफोन मोडलहरूका लागि आफ्नो यसअघिकै मूल्य कायम राख्ने सम्भावना रहेको बताइएको छ ।
सन् २०२४ को अगस्टमा प्रकाशित एक अनुसन्धान नोटमा विश्लेषक जेफ पुले आइफोन १७ सिरिजका चारवटै मोडलहरूले २४ मेगापिक्सलको फ्रन्ट क्यामेरामा ठूलो अपग्रेड गर्न लागेको बताएका थिए ।
यो आइफोन १६ मोडेलहरूमा भएको १२ मेगापिक्सलको सेल्फी क्यामेराको तुलनामा दोब्बर रिजोल्युसन हो । यसमा पछि सन् २०२४ को जनवरीमा एप्पलका प्रख्यात विश्लेषक मिंग–ची कुओले पनि यसलाई पुष्टि गरेका थिए ।
उनले सन् २०२४ को अक्टोबरमा बताएअनुसार आइफोन १७ प्रो मोडेलमा पछाडि नयाँ डिजाइन गरिएको तेर्सो ट्रिपल–क्यामेरा सेटअप हुनेछ । जसमा ३.५ अप्टिकल जुम क्षमता भएको ४८ मेगापिक्सलको टेलिफोटो लेन्स समावेश हुनेछ ।
अन्य फिचरहरूमा आइफोन १७ प्रो र प्रो म्याक्समा एप्पलको आगामी ए १९ प्रो चिपसेटले शक्ति प्रदान गर्नसक्ने बताइएको छ । यसले सुधारिएको ऊर्जा दक्षता साथै गति र समग्र प्रदर्शनमा उल्लेखनीय वृद्धि प्रदान गर्ने बताइएको छ ।
यस विपरीत नियमित आइफोन १७ र आइफोन १७ एयरले आइफोन १६ का माडेलहरूमा प्रयोग भएको ए १८ प्रोसेसर नै प्रयोग गर्ने अपेक्षा गरिएको बताइएको छ ।
स्ट्यान्डर्ड आइफोन १७ ले आइफोन १६ को समग्र लुकलाई धेरै हदसम्म कायम राख्ने बताइएको छ । यसमा कम मात्रै परिवर्तनहरू हुने बताइएको छ ।
हालसम्म, बाहिर आएका डिजाइन सम्बन्धी अधिकांश सूचना र अनुमानहरू आइफोन १७ एयर र आइफोन १७ प्रो मोडेलमा केन्द्रित रहेको र यसले आधारभूत नयाँ मोडलमा सबैभन्दा कम अपडेटहरू देखिनसक्ने बताइएको छ ।
यसैबीच, आइफोन १७ प्रो मोडेलमा एप्पलको प्रतिष्ठित लोगोको स्थान परिवर्तन हुनसक्ने बताइएको छ । एप्पलको लोगो परम्परागत मध्य स्थानबाट नयाँ पुनः डिजाइन गरिएको रियर क्यामेरा बारको ठीक तल नयाँ स्थानमा सर्नसक्ने बताइएको छ ।
एप्पलले सबै मोडलहरूमा फ्रन्ट–फेसिङ क्यामेराको मेगापिक्सललाई १२ मेगापिक्सलबाट दोब्बर बनाएर २४ मेगापिक्सलमा अपग्रेड गर्दै छ, जसले सार्प सेल्फीहरू र राम्रो भिडियो कलहरू गर्न सहयोग गर्नेछ ।
प्रो र प्रो म्याक्स भेरियन्टहरूले पछाडिको क्यामेरामा ठूलो अपग्रेड प्राप्त गर्न सक्छन्, जसमा आइफोन १६ प्रो सिरिजको १२ मेगापिक्सल लेन्सको सट्टा ४८ मेगापिक्सल टेलिफोटो लेन्स समावेश हुनेछ ।
एप्पलले १५ र १६ प्रो मोडलहरूमा प्रयोग भएको टाइटेनियम फ्रेमलाई हटाएर हल्का एलुमिनियम फ्रेमको प्रयोग गर्ने बताइएको छ । नयाँ एलुमिनियम–ग्लास हाइब्रिड रियर प्यानल र नयाँ क्यामेरा बम्प हुने बताइएको छ ।
यसमा नरम कुनाहरूसहित आयातकार हाउजिङ हुनेछ । तर, यसअघिकै त्रिकोणीय लेन्स व्यवस्था कायम रहनेछ । प्रो मोडलहरूमा एप्पलको अर्को पुस्ताको ए १९ प्रो चिपले शक्ति प्रदान गर्नेछ, जुन टीएसएमसीको ३ न्यानोमिटर प्रक्रियामा निर्मित छ ।
प्रयोगकर्ताहरूले उत्कृष्ट गति र टिकाउ ब्याट्रीको अनुभव गर्न सक्छन् । एप्पलले पहिलोपटक सबै आइफोन १७ मोडलहरूमा ब्रोडकम चिपहरूको सट्टा प्रोप्राइट्री वाइ–फाइ ७ चिप समावेश गर्ने योजना बनाएको छ ।
यसले कनेक्टिभिटी सुधार गरेर तेस्रो पक्ष आपूर्तिकर्ताहरूमा निर्भरता कम गर्नेछ । प्रो र एयर मोडलहरूमा ८ जीबीबाट १२ जीबी ¥याममा वृद्धि हुनेछ । यसले एप्पल इन्टेलिजेन्सअन्तर्गत सुधारिएको मल्टिटास्किङ र एआई–सुसज्जित सुविधाहरूलाई विकास गर्नेछ ।
