१५ साउन ,काठमाण्डौ ।
यही साता यु २० नेपाली महिला टोलीका मुख्य प्रशिक्षक याम प्रसाद गुरुङले नेपाली टोलीको घोषणा गरेका थिए । प्रतियोगितामा नेपाल रहेको समूह ‘ए’ मा दक्षिण कोरिया, भुटान र साउदी अरेबिया पनि छन् ।
मुख्य प्रशिक्षक यामप्रसाद गुरुङले आत्मविश्वासका साथ आफ्नो टोलीले लक्ष्य प्राप्त गर्ने बताएका छन् । उत्तर कोरिया, साउदी अरब र आयोजक भुटान रहेको समूह ‘बी’ मा रहेको नेपाललाई गुरुङ ‘डार्क हर्स’ मान्छन् ।
उनी भन्छन्, ‘दुई टोलीलाई हराएर उत्तर कोरियाविरुद्ध ड्र गर्ने रणनीतिमा छौं।’ केही दिनअघि मात्रै बंगलादेशमा सम्पन्न साफ महिला यु–२० च्याम्पियनसिपमा नेपाल उपविजेता बनेको थियो।
पहिलोपल्ट उपाधि जित्ने लक्ष्यसाथ ढाका पुगे पनि नेपालले त्यो अनुसार खेल प्रदर्शन गर्न सकेन । भुटानलाई ६–१ र ८–० तथा श्रीलंकालाई दुईपल्ट समान ७–० ले पराजित गरेको नेपालले दुवै खेलमा घरेलु टोलीसँग ३–२ र ४–० को हार बेहो¥यो ।
ती दुई खेलमा डिफेन्स लाइनको कमजोरी प्रष्ट देखियो । उपाधिका लागि निर्णायक मानिएको अन्तिम खेलमा गोलकिपर सुजता तामाङको प्रदर्शन त झनै फितलो रह्यो ।
यी गल्तीलाई गुरुङ सहर्ष स्वीकार्छन् । त्यस अनुभवलाई सशक्त बनाउन हालको अभ्यासमा डिफेन्समा विशेष ध्यान दिएको उनको भनाइ छ ।
उनी भन्छन्,‘त्यो हारको मूल कारण टोलीमा थकान, ट्रान्जिसन र डिफेन्सिभ लाइनको कमजोरी थियो। ६ दिनको समयमै मैले डिफेन्स र मिडफिल्ड ट्रान्जिसनमा धेरै होमवर्क गरें। गोलकिपरको कमजोरी पनि देखिएको थियो, त्यसमा सुधार गर्दैछौं।’
गुरुङले भुटान जाने टोलीमा एक मात्र परिवर्तन गरेका छन् । झुमा विश्वकर्माको सट्टा सजिना स्याङ्तान टोलीमा परेकी छन् । साफका कुनै खेलमा मैदान नउत्रिएकी उनको स्थानमा गुरुङले नयाँ अनुहारलाई समेटेका हुन् ।
यो टोली बंगलादेशमा प्रदर्शन गरेको टोलीकै निरन्तरता हो, जसले भुटान र श्रीलंकाजस्तो कमजोर टोलीविरुद्ध २८ गोलको भारी बोकाएको थियो । तर, जित्नै पर्ने खेलमा भने नराम्ररी चुक्न पुग्यो ।
कहिलेकाहीँ आफूले खेलाडीहरूसँग बढी अपेक्षा राख्ने गरेको अनुभव गुरुङ सुनाउँछन् । त्यो उनले साफबाट महसुस गरेका छन्। महिला खेलाडीहरूसँग सहज संवाद र सहकार्य गर्न सकिने बताउँदै उनी भन्छन्, ‘रातभरि टिभी हेरेर आफैंलाई सोधें गल्ती कहाँ भयो? महिला खेलाडीहरूले प्रशिक्षकको डिमाण्ड चाँडो बुझ्ने रहेछन्।’
टोलीमा चोटपटकको अवस्था छैन, खेलाडीहरू हौसिएका छन् र प्रशिक्षकको मनमा एउटा मात्रै लक्ष्य छ– अन्तिम चरणमा पुग्ने। समूहको सबैभन्दा बलियो प्रतिद्वन्द्वी उत्तर कोरिया हो, जसले तीनपल्ट यु–२० विश्वकप र दुईपल्ट एसिनय कप जितिसकेको छ।
गत वर्ष यो टोलीले रुसमा विश्वकप र उज्बेकिस्तानमा एसियन कपको उपाधि उचालेको थियो । ती दुवै प्रतियोगिताको फाइनलमा उत्तर कोरियाले जापानलाई नै पाखा लगाएको हो ।
छनोटका बाँकीका दुई टोली भने नेपालका लागि सहज हुनेछन् । नेपालले साफ महिला यु–२० च्याम्पियनसिपमा भुटानलाई ६–१ र ८–० ले पराजित गरिसकेको छ । अर्कोतर्फ साउदी अरब भुटानभन्दा पनि कमजोर टोली हो।
यो टोलीलाई भुटानले साफ खेल्न जानुअघिको अभ्यास खेलमा दुईपल्ट फराकिलो गोलअन्तरले पराजित गरेको थियो । हरेक समूहको शीर्ष स्थानमा रहने टोलीले एसियन कप खेल्न सिधै थाइल्यान्ड जाने टिकट पक्का गर्नेछन् ।
समूहको दोस्रो स्थानमा रहने टोलीले पनि केही मौका पाउने छन्। यद्यपि, गुरुङको रणनीति स्पष्ट छ– उत्तर कोरियासँगको खेलमा ड्र निकाल्नै पर्छ।’
त्यसैले यो खेल नेपालका लागि आत्मबलको परीक्षाको घडी पनि हुनेछ। उनी आफैं भन्छन्, ‘हामी अध्यारोमा दौडिने टिम हौं डार्क हर्स हो। नेपाललाई अन्डरएस्टिमेट नगर्नुहोस्।’
नेपाली महिला यु–२० टोलीको यो साहस र संघर्षले यसपटक भुटानको मैदानमा नयाँ इतिहास लेख्ने सम्भावना बोकेको छ । अब नेपाली टोलीको सारा ध्यान तीन खेल, तीन प्रयास र एसियन कप २०२६ को टिकटमा हुनेछ ।
[addthis tool="addthis_inline_share_toolbox_jbtm"]
