२२ भदौ , काठमाण्डौ ।
क्रिस्टियानो रोनाल्डोले छैटौं विश्वकप खेल्ने लक्ष्यतर्फको यात्रालाई धमाकेदार रूपमा सुरु गरेका छन् । विश्व कप छनोटमा शनिवार आर्मेनियाविरुद्ध उनले दुई गोल गरेपछि पोर्चुगलले ५–० ले जित्यो । यो खेल पोर्चुगलका लागि भावुक पनि रह्यो । जुलाईमा सडक दुर्घटनामा आफ्ना फरवार्ड डियोगो जोटा र उनका दाजु आन्द्रे सिल्भाको निधनपछि पहिलो अन्तर्राष्ट्रिय खेल थियो ।
खेल सुरु हुनुअघि मौनधारण गरेर श्रद्धाञ्जली दिइयो । उनले २१ र ४६ औं मिनेटमा गोल गरेका थिए । दोस्रो गोल उनले करिब २५ मिटर टाढाबाट शक्तिशाली प्रहारमार्फत गरे, जसले उनको पुरानो प्रदर्शनलाई फेरि सम्झायो । यससँगै ४० वर्षीय स्ट्राइकरले अन्तर्राष्ट्रिय फुटबलमा पुरुषतर्फकै सर्वाधिक गोलकर्ता भएको आफ्नै कीर्तिमानलाई १४० गोलसम्म पु¥याए ।
करिअरको अन्तिम चरणतर्फ अघि बढिरहे पनि नयाँ कीर्तिमान बनाउने उनको उत्साह अझै कम भएको छैन भन्ने प्रमाण उनले फेरि प्रस्तुत गरे । खेलमा जोआओ फेलिक्सले २ र जोआओ कन्सेलोले अर्को गोल थपे । कन्सेलोले गोलको खुसियाली मनाउभदा जोटाको सम्झनामा आकाशतर्फ हात उठाए ।
फेलिक्सले १० औं र ६१ तथा कन्सेलोले ३२ औं मिनेटमा गोल गरेका थिए । प्रशिक्षक रोबर्टो मार्टिनेजले तयारी राम्रो भएको र मंगलबार हुने हंगेरीविरुद्धको खेललाई अर्को चुनौती रहेको बताए । उनले २१औं मिनेटमा रोनाल्डोले गरेको गोललाई जोटासँग जोड्दै भने– ‘२१ नम्बर उसको जर्सी नम्बर थियो, त्यसैले त्यो गोल उसलाई समर्पित भयो।’ रोनाल्डोले हालै साउदी क्लब अल नसरसँग नयाँ सम्झौता गरेका छन् ।
उनको कप्तानीमा जुनमा पोर्चुगलले नेसन्स लिग जितेको थियो । तर विश्वकप उपाधि भने अझै उनको अपूरो सपना बनेको छ । उनका प्रतिद्वन्द्वी लियोनल मेस्सीले सन् २०२२ मा अर्जेन्टिनाका लागि विश्व कप जितेका थिए । अमेरिका, क्यानडा र मेक्सिकोमा हुने आगामी विश्वकप सम्भवतः रोनाल्डोको अन्तिम मौका हुनेछ ।
त्यतिबेला उनको चिरप्रतिद्वन्द्वी लिओनल मेसी पनि छैटौं विश्वकप खेल्दै हुनेछन् । त्यस्तै, इंग्ल्यान्डले पनि आफ्नो छनोट यात्रामा शतप्रतिशत नतिजा कायम राखेको छ । विश्वकप छनोटमा इङ्ल्यान्डले अन्दोरालाई २–० ले हराउँदै मुख्य प्रशिक्षक थोमस टुचेलको नेतृत्वमा लगातार चौथो जित दर्ता गरेको हो ।
भिल्ला पार्कमा भएको खेलमा २५औं मिनेटमा अन्दोराका डिफेन्डर क्रिस्टियन गार्सियाले नोनि मादुएकेको क्रसलाई आत्मघाती गोलमा परिणत गरेपछि इङ्ल्यान्डले अग्रता लियो । ६७ औं मिनेटमा डेक्लान राइसले रिस जेम्सको क्रसलाई हेड गर्दै दोस्रो गोल गरे।
यसअघि अन्दोराका गोलकिपर इकर अल्भारेजले इलियट एन्डरसनको प्रयास रोकेर टोलीलाई खेलमा टिकाइरहेका थिए । नटिङ्घम फरेस्टका मिडफिल्डर एन्डरसनले टुचेलको प्रशिक्षणमा डेब्यू गरेका थिए र प्रभावशाली प्रदर्शन गरे । ‘ऊर्जा सही थियो, खेलपनि राम्रो थियो। तर, हामीले अझ धेरै गोल गर्नुपर्ने थियो,’ खेलपछि प्रशिक्षक टुचेलले भने ।
तर, इङ्ल्यान्डका सर्वकालीन शीर्ष गोलकर्ता ह्यारी केनले कीर्तिमान थप्न सकेनन् । सबैभन्दा ठूलो मौका पहिलो हाफमै आएको थियो, तर जेम्सको क्रसलाई खाली पोस्टमा गोल गर्न उनी असफल भए । समूह ‘के’ मा सर्बियाले लाट्भियालाई १–० ले हराउँदै दोस्रो स्थानमा उक्लिएको छ ।
अब मंगलबार इङ्ल्यान्डले सर्बियाविरुद्ध खेल्नेछ, जुन समूहको सबैभन्दा कठिन खेल मानिएको छ । टुचेलले भने,‘हामीलाई थाहा छ के आउँदैछ । यो निकै कठिन अवे खेल हो। तर, यसले छनोटमा ठूलो कदम चाल्न मद्दत गर्नेछ भन्ने कुरा हामी पूर्ण रूपमा सचेत छौं।’ इङ्ग्ल्याण्ड ९ अंकसहित समूह ‘के’ को शीर्ष स्थानमा छ ।
