२४ असोज , काठमाण्डौ ।
ओमानमा जारी आइसिसी टी–२० विश्वकप एसिया एन्ड इएपी छनोटमा शानदार सुरुवात गरेको नेपालले आज आफ्नो दोस्रो खेलमा जापानसँग खेल्दैछ। नेपाल र जापानबीच आज अपराह्न सवा ४ बजे खेल सुरू हुनेछ।
समूह २ मा रहेको दुवै टोलीले एक÷एक खेल जितेर शीर्ष ६ मा स्थान बनाइसकेका छन्। नेपाल र जापान दुवैले पहिलो खेलमा कुवेतलाई पराजित गरेका थिए । आज हुने खेलबाट समूह विजेता र उपविजेताको निक्र्योल हुनेछ।
जापानले बिहीबार कुवेतले दिएको १७८ रनको फराकिलो लक्ष्य पूरा गर्दै ५ विकेटले पराजित गरेको थियो। बुधबार नेपालले कुवेतलाई ५८ रनले पराजित गरेको थियो। आज हुने खेल दुवै टोलीका लागि महत्वपूर्ण छ।
किनभने यो खेलको अंक सुपर–६ मा पनि गनिनेछ। छनोटबाट तीन टोलीले आगामी वर्षको फेब्रुअरी–मार्च भारत र श्रीलंकामा हुने आइसिसी टी–२० विश्वकप २०२६ मा मा स्थान पक्का गर्नेछन्।
सुपर–६ पछि नेपालका लागि विश्वकपमा छनोट हुन शीर्ष तीनभित्र पर्नु पर्नेछ। एसिया छनोटको अरू समूहमा मलेसिया, कतार र युएई तथा ओमान, पिएनजी सामोआ छन्।
तीन समूहका शीर्ष २–२ टोली गरी सुपर–६ मा पुग्ने कुल ६ टोलीले एकअर्काविरूद्ध खेल्नेछन्। यद्यपी आफ्नो समूहबाट आएको टोलीसँग भने सुपर–६ मा प्रतिस्पर्धा हुनेछैन।
त्यसैले समूह चरणको जित पनि सुपर–६ मा महत्वपूर्ण हुनेछ। किनकी सुपर–६ मा पुग्ने आफ्नो समूहको टोलीविरूद्धको अंक पनि सुपर–६ मा गनिनेछ। शीर्ष तीन टोलीमा परेमा नेपाली टोली लगातार दोस्रो पटक र समग्रमा तेस्रो पटक आइसिसी टी–२० कपमा छनोट हुनेछ।
भर्खर्रै युएईको शारजाहमा वेस्ट इन्डिजविरूद्धको टी–२० सिरिज २–१ ले जितेर इतिहास रचेको नेपाली टोली फेरि अर्को इतिहास बनाउने लक्ष्यमा छ। १७ टोलीले विश्वकप छनोटमा स्थान पक्का गरिसकेको अवस्थामा यो छनोटसँगै आगामी वर्ष टी–२० विश्वकप खेल्ने सबै टोलीको टुंगो लाग्नेछ।
दुई खेलमा लगातार पराजित हुँदै कुवेत भने प्रतियोगिताबाट बाहिरी सकेको छ । आईसीसी पुरुष टी–२० विश्वकप छनोटमा आज तीन खेल हुँदैछ । आज पहिलो खेलमा पौने १२ बजे मलेसिया र संयुक्त अरब इमिरेट्स, दोस्रो खेलमा दिउँसो ४ः१५ बजे नेपाल र जापान तथा तेस्रो खेलमा राति ८ः४५ बजे ओमान र पपुवा न्यूगिनी खेल्नेछन् ।
विश्वकप छनोटमा नेपाली टोलीमा रोहित कुमार पौडेल (कप्तान), दीपेन्द्रसिंह ऐरी (उपकप्तान)सहित कुशल भुर्तेल, लोकेस बम, कुशल मल्ल, आसिफ सेख, आदिल अन्सारी, करण केसी, नन्दन यादव, सन्दीप लामिछाने, सन्दीप जोरा, आरिफ सेख, ललितनारायण राजवंशी, गुलशन झा, सोमपाल कामी रहेका छन् ।
नेपालका ओपनर कुशल भुर्तेल लय पक्रिएका छन्। बलिङमा सन्दीप लामिछाने र ललितनारायण राजवंशीले समान दुई–दुई विकेट लिएपछि टोलीको सन्तुलन अझ बलियो बनेको छ। पौडेलको कप्तानीमा टिममा ब्याटिङ र बलिङ दुवैमा स्पष्ट विश्वास देखिन्छ।
तर, जापान पनि अब कमजोर विपक्षी होइन। कुवेतमाथि ५ विकेटको जितपछि केन्डल काडोवाकी फ्लेमिङको टोली आत्मविश्वासका साथ मैदानमा उत्रिँदैछ। इसाम रहमानको ६४ रन र डेक्लन सुजुकी म्याककोम्बको ३ विकेटले जापान पनि नेपालसँगै सुपर सिक्समा पुगिसकेको छ।
दुवै टोली सुपर सिक्समा पुगिसके पनि समूह विजेताको टुंगो आजको नतिजाले निर्धारण गर्नेछ। नेपाल र जापान पहिलो पटक टी–२० अन्तर्राष्ट्रिय मैदानमा आमनेसामने हुन लागेका हुन्।
नेपाली टोलीका लागि यो नयाँ चुनौती मात्र होइन, आफ्नो उदीयमान प्रभुत्व पुष्टि गर्ने अवसर पनि हो। यो खेल समूह चरणको सबैभन्दा प्रतिक्षित खेल बन्न पुगेको छ। आइसीसी वरीयतामा भने जापान नेपाल भन्दा निक्कै तल छ ।
आइसीसी टि २० वरीयतामा नेपाल १८ औं स्थानमा छ भने जापान ४३ औं स्थानमा रहेको छ।
