१६ कार्तिक , काठमाण्डौ ।
सामाजिक संजालमा लेखेका अभिब्यक्तिकै कारण समय समयमा विवादमा तानिदै आएका काठमाडौं महानगरपालिकाका मेयर बालेन शाह फेरि विवादमा तानिएका छन् । जेनजी आन्दोलनमा रणनीतिक रुपमा भूमिका खेलेको विषयमा विभिन्न टिप्पणी भइरहेका बेला गएमध्यरातमा उनले एक स्टाटस लेखे ।
जसको चर्काे आलोचना पछि उनले केही बेरमै डिलिट गरेका छन् । अश्लील शब्दसमेत मिसाएर दुई छिमेकी मुलुक चीन र भारतसहित अमेरिका र नेपालका प्रमुख राजनीतिक दलहरूको नाम उनले स्टाटसमा उल्लेख गरेका थिए । उनले अहिले उक्त स्टाटस सञ्जालबाट हटाइसकेका छन् ।
पोस्ट गरेको केही मिनेटमै उनीमाथि चर्को आलोचना सुरू भैसकेको थियो । पछिल्लोपटक बालेनलाई अन्तर्राष्ट्रिय शक्तिसङ्ग साठगाठ गरेको आरोप लाग्ने गरेको छ । यसैबीच उनले चीन, भारत, अमेरिकासहितको नाम उल्लेख गरेर व्यक्त गरेको अभिव्यक्तिमाथि अहिले सञ्जालमा बहस सुरू हुन थालेको छ ।
जेनजी आन्दोलनपछि बनेको अन्तरिम सरकार निर्माणमा अदृश्य शक्ति बनेर सक्रिय भएको आरोप बालेनमाथि लाग्दै आएको छ। मेयर साहले सामाजिक सञ्जालमा आपत्तिजनक अंग्रेजी शब्द प्रयोग गर्दै नेपालको दुई छिमेकी मुलुक चीन र भारतसँगै अमेरिका, नेकपा (एमाले), नेपाली कांग्रेस, राष्ट्रिय स्वतन्त्र पार्टी (रास्वपा), राष्ट्रिय प्रजातन्त्र पार्टी (राप्रपा) र नेकपा (माओवादी केन्द्र)को विरोध गरेका हुन् । साथै, स्टाटसमा मेयर साहले ‘तिमीहरू सबै मिलेर केही गर्न सक्दैनौँ ।’
भन्ने लेखेका थिए । पोस्ट सार्वजनिक भएको केही मिनेटमै उनको स्टाटसको चर्को आलोचनापछि मेयर साहले स्टाटस डिलिट गरेका थिए । साहले आफ्नो फेसबुक वालबाट हटाए पनि स्टाटसको स्क्रिनसर्ट सामाजिक सञ्जालमा भाइरल भइरहेको छ ।
यसअघि उनले सिंहदरबारमा आगो लगाइदिन्छु भन्ने स्टाटस निक्कै विवादित बनेको थियो । जेनजी आन्दोलनमा सिंहदरबारमा आगजनी भएपछि एमालेका अध्यक्ष केपीशर्मा ओलीले सोही स्टाटस तर्फ लक्षित गर्दै बालेनमाथि संघिन आरोप लगाइसकेका छन् ।
जेनजी आन्दोलनमा बालेनले विदेशी शक्तिको आडमा भूमिकामा खेलेको कतिपयले टिप्पणी गर्दै उनलाई लुसिफरको संज्ञा दिँदै आएका छन् । पछिल्लो समय बालेनले गृहमन्त्री ओमप्रमकाश अर्याललाई हटाउन दबाब दिएको भन्दै आलोचना भइरहेको छ । तर प्रधानमन्त्री सुशीला कार्कीले नै बालेनले यस्तो कुनै दबाब नदिएको बताएकी छन् ।
