२५ मंसिर , काठमाण्डौ ।
प्रधानमन्त्री सुशीला कार्की र पुर्व राष्ट्रपति विद्यादेवी भण्डारीबीच तीन दिनअघि भएको भेटवार्तापछि एमाले बृत्तामा खैलाबैला मच्चिएको छ। नेकपा एमालेका नेता महेश बस्नेतले प्रधानमन्त्री सुशीला कार्की र पूर्वराष्ट्रपति विद्यादेवी भण्डारीबीच एमाले अध्यक्ष केपी शर्मा ओलीलाई गिरफ्तार गर्ने विषयमा सल्लाह भएको दावी गरेका छन् ।
बस्नेतले फेसबुक मार्फत ’षड्यन्त्रको नयाँ खेल भन्दै यस्तो दाबी गरेका हुन् । उनले लेखेका छन्, ’दुई दिनअघि मात्र प्रधानमन्त्री कार्की र पूर्वराष्ट्रपति भण्डारीबीच भएको भनिएको वार्तामा ओलीलाई गिरफ्तार गर्ने कुरा भएको रहस्य खुलेको छ ।
उनले यो घटनालाई हिजो मात्र ’ जेनजी समूहको नाममा गरिएको नाटकीय वार्ता र सम्झौता, हिमेश पन्तलगायतका सेलिब्रिटीहरूले फैलाएको भ्रम र ’केपी ओली गिरफ्तार भन्ने मिडिया ट्रायल सँग जोडेका छन् ।
उनले थप लेखेका छन्, ’यी सबै कुरा एउटै दिशातिर संकेत गर्छन्, एमालेको आसन्न महाधिवेशन भाँड्ने, आतंक फैलाउने, सहभागिता घटाउने र अन्ततः अध्यक्ष ओलीको लोकप्रियता कमजोर पार्ने, उनले, ’महाधिवेशनमा चुनाव भए सके हराउने, नसके भोट घटाउने नै उनीहरूको अन्तिम उद्देश्य हो ।
बस्नेतले हिजोको पत्रकार सम्मेलनमा एमालेको अध्यक्षका उम्मेदवार तथा एमाले वरिष्ठ नेता ईश्वर पोखरेलले भनेको कुरालाई पनि जोडेका छन्, ’किन हाम्रो अध्यक्ष आयोगमा बयान दिन जानुभएन भन्ने प्रश्न पत्रकारहरूले सोध्न भुल्नुभयो । म भए जान्थेँ, उहाँ पनि जानैपर्छ । बस्नेतले एमाले यो सबै षड्यन्त्रको सामना गर्न पूर्णरूपमा सक्षम रहेको चेतावनी दिएका छन् । ’पार्टी आफ्नो अडानमा अडिग छ । अध्यक्षलाई दबाब दिने वा गिरफ्तार गर्ने कुनै पनि चाल सफल हुने छैन, उनले लेखेका छन् ।
उनले अन्त्यमा भनेका छन्, ’तिमीहरूका हरेक कर्तुत र योजना अब पूर्ण रूपमा बुझिसकिएको छ । अब सशक्त प्रतिरोध हुनेछ र तिमीहरूको खेल नजन्मदै तुहिनेछ ।
आइतबार प्रधानमन्त्री सुशीला कार्की र पूर्वराष्ट्रपति विद्यादेवी भण्डारीबीच भेटवार्ता भएको थियो ।
प्रधानमन्त्रीलाई भेट्न पूर्वराष्ट्रपति भण्डारी सिंहदरबार पुगेकी थिइन । भेटमा समसामयिक राजनीतिक घटनाक्रमका विषयमा छलफल भएको प्रधानमन्त्रीको सचिवालयले जनाएको छ । प्रधानमन्त्रीले आगामी निर्वाचन र निर्वाचनको तयारीमा लागेको सरकारका कामका बारेमा पूर्वराष्ट्रपतिलाई जानकारी गराएकी थिइन ।
त्यस्तै जेन–जी आन्दोलन, आन्दोलनका शहीद परिवारको माग, घाइतेको माग र माग सुनुवाइका क्रममा सरकारले गरेको कामका विषयमा पनि पूर्वराष्ट्रपतिलाई जानकारी गराएको सचिवालयले जनाएको छ ।
पूर्वराष्ट्रपति भण्डारीले प्रधानमन्त्रीसँगको भेटपछि सिंहदरबारको अवलोकन गरेकी थिइन । प्रधानमन्त्री र पुर्वराष्ट्रपतिबीचको भेटलाई कतिपयले ओली र कांग्रेस सभापति शेरबहादुर देउवाबीचको भेटको काउन्टरका रुपमा टिप्पणी गरेका थिए ।
प्रधानमन्त्रीले यसअघि नै पूर्वराष्ट्रपतिसँग भेटवार्ताका लागि गृहमन्त्री ओमप्रकाश अर्याल र संचारमन्त्री जगदिश खरेलमार्फत सन्देश पठाएकी थिइन । पछिल्लो समय जाँचबुझ आयोगले बयानका लागि नआए ओलीलाई पक्राउ गर्ने सम्मको तयारी गरेको भन्ने खबरहरु बाहिरिरहेका छन् ।
ओलीले आफू कुनै पनि हालतमा बयान दिन नजाने बताउँदै आएका छन् । उनले आयोग नै आफ्ना लागि मान्य नभएको दलील गर्दै आएका छन् । २३ र २४ भदौका घटना जाँचबुझ गर्न गठित आयोगले नीतिगत निर्णय गर्ने र निर्देशन दिने तहका अधिकारीहरूको बयान लिन थालेको छ ।
आज मात्रै तत्कालीन प्रहरी प्रमुख र गृहसचिवसँग बयान लिदैछ । तत्कालीन प्रधानमन्त्री केपी शर्मा ओली र तत्कालीन गृहमन्त्री रमेश लेखक बयानमा नआउने देखिएपछि आयोगले उनीहरूलाई पक्राउ गरेर बयानमा ल्याउने रणनीति बनाएको छ ।
५ असोजमा गठित आयोगको म्याद ३ महिना अर्थात् ५ पुसभित्र सकिँदैछ । करिब २ सातामात्रै म्याद बाँकी रहँदा आयोगले बयानसमेत सकेको छैन । फिल्डमा खटिएका र आदेश कार्यान्वयन गर्ने तहमा रहेका सुरक्षाकर्मी तथा प्रशासकको बयान सकेर आयोग राजनीतिक तहमा प्रवेश गर्न थालेको छ ।
आयोगका प्रवक्ता विज्ञानराज शर्माका अनुसार करिब डेढ सय जनासँग बयान सकिएको छ । अब तत्कालीन प्रधानमन्त्री ओली, तत्कालीन गृहमन्त्री लेखक, तत्कालीन गृह सचिव गोकर्णमणि दुवाडी, प्रधानसेनापति अशोकराज सिग्देल र नेपाल प्रहरीका आईजीपी दानबहादुर कार्कीको बयान लिन बाँकी छ ।
आयोगकै सिफारिसमा तत्कालीन प्रधानमन्त्री ओली र तत्कालीन गृहमन्त्री लेखकलाई विदेश यात्रा गर्न र अनुमतिबिना काठमाडौं उपत्यकाबाहिर जान रोक लगाइएको छ । ओलीले आयोगलाई असंवैधानिक भनेर सार्वजनिक टिप्पणी गर्दै बयानमा नजाने अडान लिँदै आएका छन् ।
ओलीले जेनजी आन्दोलन विदेश षडयन्त्रमा भएको समेत टिप्पणी गर्दै आएका छन् । यस्तै नेकपा एमालेका नेता बस्नेतले केपी शर्मा ओली र रमेश लेखकलाई पक्राउ गरिए नसोचेको परिस्थिति सिर्जना हुने चेतावनी दिँदै आएका छन् ।
‘सरकारलाई कडा चेतावनी । केपी शर्मा ओली र रमेश लेखकजस्ता राष्ट्रिय नेतामाथि यदि अवैध रूपमा दबाब सिर्जना गर्दै पक्राउ गर्ने प्रयास गरियो भने, त्यसपछि उत्पन्न हुने परिस्थिति कसैको नियन्त्रणमा रहने छैन ।हामी सत्य–असत्यको लडाइँमा झुक्दैनौँ । आवश्यक प¥यो भने देशको झन्डा ओढेर मर्न तयार छौं, तर अन्याय र दमनको अगाडि कहिल्यै नटेक्नेछौँ,’ उनले भनेका छन् ।
