२९ मंसिर , काठमाण्डौ ।
सुनसरीको दुहबी नगरपालिकामा नगर आधारभूत अस्पतालले सेवा प्रारम्भ गरेको छ।
करिब १५ करोडको लागतमा नवनिर्मित १५ सैया अस्पतालको एक कार्यक्रममा बीच मेयर वेदनारायण गच्छादारले उद्घाटन गरेका छन् ।
दुहबी ११ मा करिब ३ बिगाह ६ कठ्ठा क्षेत्रफलमा संचालनमा आएको सुबिधा सम्पन्न अस्पतालमा बिशेषज्ञ सेवा, पोस्टमार्टम, चिकित्सक आवास, मिनि अपरेशन सेवा,आँखा कान उपचार, स्त्रीरोग, हाडजोर्नी, पसुति सेवा, गर्भवती महिलालाई निःशुल्क एम्बुलेन्स सेवा, इमेर्जेन्सी सेवा सन्चालनमा छन भने केहि दिनमै बालरोग सम्बन्धि सेवा सुचारु गर्ने तयारी छ ।
अस्पतालको शुभारम्भ गर्दै प्रमुख अतिथि गच्छादारले ठूलो चुनौती र संघर्षका बावजुद अस्पताल संचालनमा ल्याइएको भन्दै यसलाई निकट भबिस्यमा मेडिकल कलेजसंग जोडेर दुहबीका नागरिकलाई सबै प्रकारको उपचार सेवा दिने योजना रहेको बताए ।
मेयर गच्छदारले दुहबीलाई मेडिकल हवको रुपमा अगाडि बढाउने आफ्नो सपना भएको समेत बताएका छन्। उनले प्राइभेट पब्लिक पार्टनरसिप मोडेलबाट विकास गर्न काठमाण्डौ समेत असफल भएको दाबी गर्दै दुहबी नगरपालिकामा आफुले सफल बनाएरै छाड्ने प्रतिबद्दता सहित योजना अगाडि बढाइसकेको बताए।
दुहबीबासीको स्वास्थ्यप्रति चिन्तित गच्छादारले स्वास्थ्य क्षेत्रमा उल्लेखनीय सुधारात्मक कार्य गर्दै आएको भन्दै स्थानीयले पनि खुशी ब्यक्त गरेका छन् ।
पैसाकै कारण रोगको शिकार बनेर कोही नागरिक मर्न नपरोस भन्ने पबित्र उदेश्य बोकेका उनले कोभिड १९ को बेला दुहबी ८ को एक बन्द अवस्थाको एक उद्योगलाई बिभिन्न दाताहरुसँग सहयोग जुटाएर अस्थायी रुपमा आधारभूत अस्पताल सन्चालनमा ल्याएका थिए ।
उक्त अस्पतालमा नगर प्रमुख स्वास्थ्य बिमा कार्यक्रम’ अन्तर्गत बिपन्न , दलित र सुकुम्बासीहरुलाई ३ हजार रुपैयाँ नगरपालिकाले तिर्ने गरि स्वास्थ्य बिमासँग जोडेर उनले सेवा प्रवाह गराएका थिए ।
करिब ६४ हजार जनसंख्या रहेको दुहबीमा सुबिधायुक्त अस्पताल नहुदा बिरामीहरु सामान्य उपचारका लागि पनि बिराटनगर लगायतका अस्पतालमा धाउनु पर्ने बाध्यता अब सकिएको भन्दै नगरबासीले खुशी ब्यक्त गरेका छन् ।
दुहबीमा साप्ताहिक हाट, रंगशाला, कोल्ड स्टोर, फोहोर प्रशोधन केन्द्र, सपिङ कम्प्लेक्स, एग्रो प्रोशेसिङ सेन्टर लगायतका योजना करिब निर्माणका अन्तिम चरणमा रहेको मेयर गच्छदारले जानकारी दिएका छन् ।
यस्तै १२ वटै वडामा स्वास्थ्य चौकी, बर्थिङ सेन्टर, निःशुल्क आँखा जाँच, अपाङ्गता आत्मनिर्भर कार्यक्रम, उद्यमशीलता मार्फत लघु उद्यमी , सामूहिक कृषि, बंगुर पालन, तरकारी तथा च्याउ खेती लगायत थुप्रै आत्मनिर्भरता र आर्थिक शसक्तिकरणका कार्यहरु समेत दुहबीमा संचालित छन् ।
कार्यक्रममा नगर अस्पताल निर्माणमा योगदान गर्ने कर्मचारीहरुलाई नगद ११ हजार र दोसल्ला सहित सम्मान गरिएको थियो। २०७८ साल माघ २ गते शिलन्यास गरिएको अस्पताल तोकिएकै समयमै निर्माण सम्पन्न भएको निर्माण आयोजनाले जनाएको छ।
