विराटनगर, असोज २२
लामो समयदेखि संबिधान संशोधनको माग गरिरहेको राष्ट्रिय जनता पार्टी नेपालले आज देशभर प्रमुख जिल्ला अधिकारीमार्फत प्रधानमन्त्रीलाई ज्ञापनपत्र पठाइएको छ । ज्ञापनपत्र मार्फत संबिधान संशोधनको प्रक्रिया अगाडि नबढाए सरकारलाई दिएको समर्थन फिर्ता लिने राष्ट्रिय जनता पार्टी नेपालले चेतावनी दिएको छ ।
मोरङका प्रमुख जिल्ला अधिकारीमार्फत प्रधानमन्त्रीलाई पठाइएको ज्ञापनपत्रमा यस्तो चेतावनी दिइएको छ । पार्टीको केन्द्रीय सर्कुलर अनुसार देशभरिका सम्पुर्ण जिल्लाका प्रमुख जिल्ला अधिकारीमार्फत प्रधानमन्त्रीलाई ज्ञापनपत्र पठाउने कार्यक्रमअनुसार मोरङबाट पठाइएको ज्ञापनपत्रमा तत्काल संविधान संशोधनको प्रक्रिया अघि बढाउन माग गरिएको छ ।
निर्धारित कार्यक्रमअनुसार राष्ट्रिय जनता पार्टी नेपालका मोरङ अध्यक्ष मण्डलका संयोजक मोहम्मद कादिरले प्रमुख जिल्ला अधिकारी रमेशकुमार केसीलाई ज्ञापनपत्र बुझाएका हुन् ।
प्रधानमन्त्रीलाई पठाइएको ज्ञापनपत्रमा संविधान संशोधनको प्रक्रिया अघि बढाउने र मधेश–थरुहट आन्दोलनसँग सम्बन्धित मुद्दाहरुको समाधानगर्ने प्रतिबद्ध जनाइएपछि पार्टीले सरकारलाई समर्थन गरेको तर प्रतिबद्धताअनुसार सरकारले कुनै प्रकारको पहलकदमी नगरेको उल्लेख छ ।
देशमा बलात्कार र हत्याहिंसा बढेको तथा कालोबाजारी नियन्त्रण गर्न सरकार असफल भएको ज्ञापनपत्रमा दाबी गरिएको छ । राजपाले उठाउँदै आएका माग र मुद्दाहरुलाई सम्बोधन नगरिए देश फेरि संघर्ष र आन्दोलनमा धकेलिन बाध्य हुने चेतावनीसमेत दिइएको छ ।
