एजेन्सी, कात्तिक २९
अन्तर्राष्ट्रिय मैत्रीपूर्ण खेलमा एसियाली राष्ट्र कतारले युरोपेली राष्ट्र स्विटजरल्यान्डलाई १–० ले पराजित गरेको छ । फिफा वरियतामा ९६ औं स्थानमा रहेको कतारले आफूभन्दा ८८ स्थान माथि आठौं स्थानमा रहेको स्विटजरल्यान्डमाथि पहिलो जित दर्ता गरेको हो ।
बुधबार राती भएको खेलमा कतारका लागि अक्रम अफिफले ८६ औं मिनेटमा विजयी गोल गरेका थिए । अफिफले नियमित समय सकिनुभन्दा ४ मिनेट अगाडी गोल गर्दै जित पक्का गरे । कतारका मिडफिल्डरले मैदानको मध्यभागमा बल खोसेपछि दिएको थ्रु बलमा अफिफले गोलरक्षक भोन वोगोलाई छक्याउँदै खाली पोस्टमा गोल गरेका थिए ।
कतारले पछिल्लो समय ठूला राष्ट्रसँग मैत्रीपूर्ण खेल खेल्दै आफ्नो टोलीलाई तयार गर्दै आइरहेको छ । विश्वकपको अन्तिम १६ मा पुगेको स्विटजरल्यान्डले घरेलु मैदानमा पछिल्लो १० खेलमा ९ क्लिन सिट राखेको थियो ।
कतारले अब सोमबार हुने मैत्रीपूर्ण खेलमा आइसल्यान्डको सामना गर्नेछ । कतारले जनवरी २०१९ मा हुने एसियन कपमा प्रतिस्पर्धा गर्दैछ । अर्को वर्ष ब्राजिलमा हुने कोपा अमेरिकाको लागि पनि कतार आमन्त्रित टोलीको रुपमा सहभागिता जनाउँदैछ ।
