एजेन्सी, मंसिर ११
यूएईमा जारी टी–१० लिगमा अघिल्ला तीन खेलमा राम्रो प्रदर्शन गरेका नेपाली यूवा स्पिनर सन्दीप लामिछाने चौथो खेलमा महंगो सावित भएका छन् ।
पञ्जावी लिजेन्ड्सविरुद्धको खेलमा आफ्नो दुइ ओभर गर्दै सन्दीपले २८ रन खर्चिए भने कुनै विकेट हात पार्न सकेनन् । दोस्रो ओभरमा सन्दीपले उमर अकमललाई बलिङ्ग गरेका थिए। अकमलले त्यही ओभरमा १ छक्का सहित ३ चौका प्रहार गरे ।
छैठौ ओभरमा व्यक्तिगत दोस्रो ओभर गरेका सन्दीपले दुइ चौकाको सामना गरे। पहिलो खेलमा २, दोस्रोमा १ तथा पछिल्लो खेलमा २ विकेट लिएका सन्दीपले चौथो खेलमा विकेट लिन नसकेका हुन् ।
सो खेलमा सन्दीप लामिछाने सम्मिलित केराला नाइट्स ३६ रनले पराजित भएको छ । सन्दीपको टोली करेला नाइट्सले टस जितेर बलिङ्ग गर्ने निर्णय गरेको थियो। पन्जाबले निर्धारित १० ओभरमा ५ विकेट गुमाउँदै १ सय ७ रन बनायो।पन्जाबका लागि अकमलले सर्वाधिक ३० रन जोडे।
जवाफमा केरालाको लागि ओपनर क्रिस गेल बाहेक अन्य कुनै ब्याट्सम्यानले दोहोरो अङ्क जोड्न सकेनन् । केरालाले नवौं ओभरमा अलआउट हुनुअघि ७१ रन मात्र बनाउन सक्यो । गेलले १९ बलमा ३५ रनको योगदान दिए । सन्दीप १ रनमा नटआउट रहे । पन्जाबका लागि म्यान अफ दि म्याच हसन खानले ४ तथा प्रविण कुमारले ३ विकेट लिए ।
