बिराटनगर, मंसिर २६
उदयपुरको कटारी नगरपालिका–८ घुम्ती शिरिसेमा बुधबार बिहान ३ वटा घरमा आगलागी हुँदा अन्दाजी ८ लाख मूल्य बराबरको क्षति भएको छ ।
बिहान करिब साढे ३ बजेको समयमा सोही स्थान बस्ने कृष्णलाल श्रेष्ठको फूसको छाना भएको १ तले घर, नगद १५ हजार, किरानासामान, अन्नपात, लत्ताकपडा, भाँडावर्तन सहित अन्दाजी ४ लाख मूल्य बराबरको क्षति भएको छ ।
त्यसैगरी दिल बहादुर श्रेष्ठको फूसको छाना भएको १ तले घर र काठपात सहित अन्दाजी १ लाख मूल्य बराबरको क्षति भएको छ । साथै मकर बहादुर श्रेष्ठको फूसको छाना भएको १ तले घर, नगद ३ हजार, लत्ताकपडा, भाँडावर्तन र अन्नपात सहित अन्दाजी ३ लाख मूल्य बराबरको क्षति भएको छ ।
इलाका प्रहरी कार्यालय कटारीको प्रहरी टोली ,दमकल र स्थानीयवासीको सहयोगमा आगो पूर्ण रुपमा नियन्त्रणमा लिईएको उक्त कार्यालयले जनाएको छ । आगलागीको कारण खुल्न सकेको छैन ।
