एजेन्सी, पुस ८
युरोपेली च्याम्पियन रियल म्याड्रिडले लगातार तेस्रो पटक फिफा क्लब विश्वकपको उपाधि जितेको छ । शनिबार भएको फाइनलमा यूएईको अल आइनलाई ४–१ को फराकिलो अन्तरले पराजित गर्दै रियल विजेता बनेको हो ।
रियलका लागि खेलको १४ औं मिनेटमा लुका मोड्रिचले गोल गर्दै सुरुवाती अग्रता दिलाएका थिए । दोस्रो हाफको ६० औं मिनेटमा मार्कस लोरेन्टेले अग्रता दोब्बर पारे । त्यस्तै सर्जियो रामोसले ७९ औं मिनेटमा अर्को गोल गरेर ३–० को अग्रता बनाए ।
खेलको ४ मिनेट बाँकी रहँदा सुकासा सिओतानीले गोल गर्दै अग्रता कम गर्ने प्रयास गरे तर इन्ज्युरी समयमा याह्या नादेरले आत्मघाती गोल गरेपछि रियल ४–१ ले विजयी भयो ।
यो जितसँगै प्रतियोगितामा सर्वा्धिक जितको कीर्तिमान आफ्नो नाम गरेको छ । रियलको यो समग्रमा चौथो क्लब विश्वकप उपाधि हो । यसअघि बार्सिलोना र रियलले समान खेल जितेका थिए ।
मिडफिल्डर टोनी क्रुसले पछिल्ला ६ विश्वकपमध्ये ५ उपाधि आफ्नो नाम गरेका छन् । सन् २०१३ मा बायर्नबाट उपाधि जितेका क्रुसले सन् २०१५ बाहेकका सबै उपाधि जितेका छन् ।
त्यसअघि भएको तेस्रो स्थानको खेलमा अर्जे्न्टिनी क्लब रिभर प्लेटले जापानको काशीमा एन्टलर्सलाई पराजित गर्दै उपाधि जितेको थियो । रिभर प्लेटको जितमा क्लबका लागि अन्तिम खेल खेलिरहेका गोन्जालो मार्टिनेजले २ गोल गरे ।
प्रतियोगिताको उत्कृष्ट खेलाडी तथा सर्वा्धिक गोलकर्ताको उपाधि रियलका ग्यारेथ बेलले जिते । उनले २ खेलमा ३ गोल गरेका थिए । सिल्भर बल अल आईनका कैओले पाउँदा ब्रोन्ज बल रिभर प्लेटका सान्टोस बोरेले पाए । रियल म्याड्रिडले फेयर प्ले अवार्ड पनि प्राप्त गर्यो ।
