विराटनगर, पुस ११
थोत्रा ग्यांस सिलिण्डरका कारण आगलागी र ज्यानै जानेगरिका दुर्घटना बढेको भन्दै त्यसलाई न्युनिकरण गर्ने उपाय अवलम्बन गर्न सरोकारवालाले स्थानीय प्रशासन समक्ष माग गरेका छन ।
एल.पि.ग्यास विक्रेता संघ मोरङले आज जिल्ला प्रशासन कार्यालयमा ज्ञापनपत्र बुझाएको छ । संघका अध्यक्ष विकास लालवानीले मोरङका साहायक प्रमुख जिल्ला अधिकारी उमेश पाण्डेलाई ज्ञापनपत्र हस्तान्तरण गरे ।
प्रशासनलाई बुझाइएको ज्ञापनपत्रमा उद्योगहरुले बजारमा पठाउने गरेको थोत्रा सिलिण्डरका कारण दुर्घटनाहरु बढेकोले त्यस्तो प्रबृति रोक्न प्रशासनले सम्बधित निकायलाई निर्देशन दिन माग गरिएको छ ।
यस्तै विक्री पछिपनि सेवा दिनुपर्ने भएपनि ग्यांस उद्योगहरुले त्यस्तो नगर्ने गरेको र बजारमा सिलिण्डर पठाउनुअघि गम्भीरता पुर्वक चेकजांच नगर्ने कारणले दुर्घटना बढेको उल्लेख गरिएको छ ।
ग्यांस विक्रेता संघले लापरवाही गर्ने उद्योगलाई कारवाहीको दायरमा ल्याउनुपर्ने र घटनामा पीडित भएकाहरुलाई उचित क्षतिपुर्तिको ब्यवस्था गर्नुपर्ने माग पनि गरेको छ ।
ज्ञापनपत्र बुझ्दै सहायक प्रमुख जिल्ला अधिकारी पाण्डेले गुणस्तरहीन र थोत्रा सिलिण्डरहरु बजारमा पठाउने प्रबृति अन्त्य गर्न प्रशासनले ठोस कदम चाल्ने बताए ।
वितेको तीन महिनायता थोत्रा ग्यांस सिलिण्डरकै कारण मोरङमा मात्र ७ वटा दुर्घटना भएको एल.पी.ग्यांस विक्रेता संघले जनाएको छ ।
