एजेन्सी,पुस १२
इंग्लिस प्रिमियर लिग फुटबलमा म्यानचेस्टर युनाइटेडले हडर्स्फिलडमाथि ३–१ को सहज जित निकालेको छ । फ्रान्सेली मिडफिल्डर पल पोग्वाको दुई गोल मद्दतमा म्यानचेस्टर सहज जित निकालेको हो ।
मुख्य प्रशिक्षक जोसे मोरिन्होलाई बर्खास्त गरेपछि अन्तिरिम प्रशिक्षक ओले गुनर सोल्सजरको प्रशिक्षणमा रहेको युनाइटेडको यो लगातार दोस्रो जित हो ।
घरेलु मैदान ओल्ड ट्राफोर्डमा बुधबार राति भएको खेलमा अर्काे एक गोल नेमान्जा मेटिकले गोल गरे । २९औं मिनेटमा नेमानजा माटिकको गोलबाट युनाइटेडले खेलमा अग्रता बनाएको थियो ।
त्यसपछिको दुवै गोल पोग्वाको नाममा रह्यो । खेलको ६८औं मिनेटमा पोग्बाले गोल गर्दै युनाइटेडलाई २–० को अग्रता दिलाए ।त्यसको १० मिनेटपछि नै पोग्बाले व्यक्तिगत दोस्रो तथा टिमका लागि तेस्रो गोल गर्दै युनाइटेडलाई ३–० को अग्रता दिलाएका थिए ।
खेल सकिन २ मिनेट बाँकी रहँदा हडर्स्फिल्डका जोर्गेनसेनले एक गोल फर्काए । जितसँगै युनाइटेडले १९ खेलबाट ३२ अंक जोडेको छ । हडर्स्फिल्ड अंक तालिकाको पुछारमा छ ।
