विराटनगर, पुस १२
पछिल्लो समय मोरङमा खाना पकाउने ग्याँस पडकिएर मान्छेको ज्यानै समेत गएपछि अनुगमनका लागि वाणिज्य कार्यालय तातेको छ । ग्यास पड्किएर मानवीय तथा भौतिक क्षतिका घटना बढेपछि कार्यालय र उपभोक्तावादी संघसंस्थाहरुले अनुगमन सुरु गरेका छन् ।
बाणिज्य कार्यालय विराटनगर, जिल्ला प्रशासन कार्यालय मोरङ लगायतका कार्यालय र अन्य उपभोक्तावादी संघसंस्थाहरुले बिहीबार ग्याँस उद्योगहरुको अनुगमन गरेका हुन ।
टोलीले क्रममा मोरङको बुढीगंगामा रहेका कोशी ग्याँस र रिजालको ग्याँसको अनुगमन गरेको छ । कोशी ग्याँसमा अनुगमनका क्रममा बजारबाट आएको सिलिन्डरहरुलाई पुनःबजारसम्म पठाउनको लागि हाइड्रोलिक प्रेसर दिएर पठाउने गरेको पाइएको छ ।
तर बजारबाट आएको पुरानो सिलिन्डर पुन चलाउने वा चलाउन नहुने बिषय स्पष्ट नदेखिएकाले त्यसलाई पुष्टि हुने आधारसहित ३ दिन भित्रमा वाणिज्य कार्यालय विराटनगरमा उपस्थित हुन निर्देशन दिइएको वाणिज्य कार्यालय प्रमुख हिमालय बरालले बताए ।
यस्तै रिजालको ग्याँस उद्योगमा मेकानिकल व्यवस्था गर्न निर्देशन दिइएको छ भने अन्य अवस्था सामान्य रहेको पाइएको अनुगमन टोलीले जानकारी दिएको छ ।
