विराटनगर,पुस १५
आगामी फागुन २८ गतेदेखि चैत ८ गते सम्म सञ्चालन हुने पाचौं महिला साफ च्याम्पियन फुटबल प्रतियोगिता सञ्चालन गर्न विराटनगर महानगरपालिका र अखिल नेपाल फुटबल संघ एन्फा बीच सम्झौता भएको छ । प्रतियोगिता सञ्चालनका लागि रंगशाला मर्मतसहित आवश्यक संरचना तयार गर्न महानगर र एन्फा बीच आइतबार सम्झौता भएको हो ।
सो सम्झौता पत्रमा महानगर प्रमुख भीम पराजुली र एन्फा अध्यक्ष कर्माछिरिङ शेर्पाले हस्ताक्षर गरेका छन् ।प्रतियोगिता सञ्चालनकालागि महानगरपालिकाले निर्माणधीन खेलाडी चेञ्जिङ रुम रंगरोगन गर्नेछ भने रंगशाला सम्म पुग्ने सडक, पार्किङको व्यवस्थापनसँगसँगै मैदानको मर्मत सम्हारका लागि महानगरपालिकाले सहयोग गर्ने सम्झौतामा उल्लेख छ ।
सम्झौतामा महानगरपालिकाले रंगशालाको रंगरोगन, स्टेजमा रहेका कोठालाई बिशिष्ट कक्ष निर्माणका लागि आवश्यक सामाग्री उपलब्ध गराउने छ ।
प्रतियोगिताका लागि आवश्यक संरचना महानगरले फागुन १२ गते नै सम्पन्न गर्नुपर्ने छ ।महानगरपालिकाले चेञ्जिङ रुम, रेफ्री रुम, म्याच कमिस्नर रुम, खेलाडी रिफ्रेस रुम, मेडिकल रुमलगायतका पूर्वाधारमा आवश्यक विद्युत, पानी र फर्मिचरको व्यवस्थापन गर्ने छ ।
एन्फाले साफमा सहभागी राष्ट्रका प्रतिनिधि, खेलाडीलाई आमन्त्रण तथा ब्यवस्थापन गर्नेछ। प्रतियोगिता भरका लागि गृहमन्त्रालयसंग समन्वय गर्दै शान्ति सुरुक्षाको ब्यवस्थापन पनि एन्फाले नै गर्ने छ ।
सम्झौता पछि एन्फाका अध्यक्ष कर्माछिरिङ शेर्पाले अन्तर्राष्ट्रियस्तरबाट ३ सय बढी प्रतिनिधि, खेलाडी तथा खेल प्रशंसकको प्रत्यक्ष उपस्थिती रहने प्रतियोगिताले विराटनगरको गरिमा बढाउने बताए ।
प्रदेश एकको अस्थायी राजधानी विराटनगरमा हुने प्रतियोगिताले भारत, भुटान, बंगलादेशबाट पयर्टकलाई आकर्षण गर्न सकिने अध्यक्ष शेर्पाको भनाइ छ । महानगरपालिका मेयर भीम पराजुलीले प्रतियोगिता आयोजना गर्न पाउनु महानगरका लागि गौरभको बिषय भएको बताए ।(अनलाईन खबरबाट)
