एजेन्सी, पुस १८
नेपाली राष्ट्रिय टोलीका युवा बलर सन्दीप लामिछाने अष्ट्रेलियामा जारी ‘बिग बास लिग’ खेललाई बीचैमा छाडेर आज बिहान बङ्गलादेश पुगेका छन् । उनी बिग बासलाई बीचैमा छोडेर बङ्गलादेश प्रिमियर लिग (बिपिएल) क्रिकेट खेल्न अष्ट्रेलियाबाटै बङ्गलादेश प्रस्थान गरेका हुन् ।
सन्दीपले सामाजिक सञ्जाल ट्वीटरमार्फत आफू बङ्गलादेश प्रस्थान गरेको बताएका छन् । अष्ट्रेलियामा मेलबर्न स्टार्स क्लबबाट त्यहाँको लिग खेलिरहेका सन्दीपले लगातार चार खेल खेल्दै आठ विकेट लिएका छन् ।
सन्दीपले आगामी शनिबारदेखि शुरु हुने । बिपिएलमा स्यलहेट सिक्सर्सबाट खेल्ने छन् । बङ्गलादेश प्रिमियर लिगपछि सन्दीप नेपाली टोलीमा सामेल हुनेछन् । नेपालले माघको दोस्रो साताबाट युएईसँग उसैको मैदानमा एक दिवसीय र टी–२० शृङ्खला खेल्नेछ ।
बिग बास लिगमा मेलबर्न स्टार्सबाट खेलेका सन्दीपले खेलेका चार खेलमा उत्कृष्ट प्रदर्शन गर्दै लिएका आठ विकेट मध्ये पहिलो खेलमा दुई, दोस्रो खेलमा तीन, तेस्रो खेलमा दुई र चौथो खेलमा एक विकेट लिएका थिए ।
जारी लिगको चारै खेलमा विकेट लिँदै सबैभन्दा बढी विकेट लिने खेलाडीको सूचीमा आफूलाई दर्ता पनि गराइसकेका छन् । उनले चारै खेलमा विपक्षी टिमका कप्तानलाई आउट गरेका थिए ।
