बुटवल, पुस २९
गए राति रुपन्देहीमा प्रहरीको गोली लागेर एक तस्करको मृत्यु भएको छ ।रुपन्देही प्रहरी प्रमुख प्रहरी उपरीक्षक एसपी हृदय थापाका अनुसार बुटबलको सद्धार्थनगर नगरपालिका–१०, शंकरपुरमा गस्तीमा खटिएको प्रहरी टोलीमाथि अकस्मात गोली प्रहार भएपछि जवाफी कारबाहीमा गोली चलाउँदा तस्करको मृत्यु भएको हो ।
भारतीय नम्बर प्लेटको मोटरसाइकलमा आएका तस्करको समूहले राति करिब १२ बजे प्रहरीमाथि गोली चलाएपछि तत्कालै जवाफी कारबाही गरिएको प्रहरीको भनाइ छ । गोली लागि घाईते तस्करको उपचारका लागि अस्पताल लैजाँदै गर्दा मृत्यु भएको हो । मृतकको परिचय खुलेको छैन । करिब ३५ वर्षीय मृतक भारतीय नागरिक हुनसक्ने प्रहरीको अनुमान छ ।
घटनास्थलबाट प्रहरीले अटोमेटिक लोडेड पेस्तोल तथा उनले प्रयोग गरेको युपी ५३ एच २०२८ नम्बरको भारतीय मोटरसाइकल बरामद गरेको छ । तस्करको गोली लागेर एकजना प्रहरी जवान कृष्ण श्रेष्ठ पनि घाइते भएका छन् ।
